ބޭންކް އޮފް މޯލްޑިވްސް (ބީއެމްއެލް) އާއި ޓޯޓަލް ފިޓްނަސް ގްރޫޕް (ޓީއެފްޖީ) ގުޅިގެން ބާއްވަމުން އަންނަ "ބީއެމްއެލް ވައު ކިޑްޒް ރަން" ގެ މިއަހަރުގެ ދުވުން ކާމިޔާބު ކަމާ އެކު ނިންމާލައިފިއެވެ.
ތިން އުމުރުފުރާއެއްގެ ޖުމްލަ 800 އަށް ވުރެ ގިނަ ކުދިން ރަޖިސްޓްރީކުރި މި ދުވުން ބޭއްވީ ހުކުރު ދުވަހުގެ ހެނދުނު ހުޅުމާލޭގައެވެ.
މިދުވުމުގައި ބައިވެރިވި އުމުރުފުރާތަކަކީ:
- 3 އަހަރާއި 5 އަހަރާ ދެމެދު ( 1 ކިލޯ މީޓަރު)
- 6 އަހަރާއި 8 އަހަރާ ދެމެދު ( 2 ކިލޯ މީޓަރު)
- 9 އަހަރާއި 11 އަހަރާ ދެމެދު ( 3 ކިލޯ މީޓަރު)
ބީއެމްއެލްގެ ވާއު ކިޑްސް ރަންގައި ބައިވެރިވި ފަރާތްތަކުން ރަން ފަށަނީ--- ފޮޓޯ/ ބީއެމްއެލް
މިއީ ދުޅަހެޔޮ ސިއްހަތެއްގައި ހުރުމުގެ މުހިންމުކަން ކުޑަކުދިންނަށް އުނގަންނައިދިނުމުގެ ބޭނުމުގައި ބީއެމްއެލް އިން ބާއްވާ ހާއްސަ ހަރަކާތެކެވެ.
މި ދުވުމުގައި ބައިވެރިވެ ކޮންމެ ކުއްޖަކު ވެސް ދުވުން ނިންމި ވަގުތު ވަނީ މެޑަލް ދީފައެވެ.
ބީއެމްއެލްގެ ވާއު ކިޑްސް ރަން އަކީ ގިނަ އަދަދެއްގެ ކުޑަކުދިންގެ ތަރުހީބު ލިބޭ ދުވުމެކެވެ. މިއީ ބީއެމްއެލް އާއި ޓީއެފްޖީ ގުޅިގެން މި ދުވުން ބޭއްވި ހަވަނަ އަހަރެވެ.