އެއް ބޭފުޅަކު މަސްމާރުކޭޓު މަތީ ބޮޑު ހޮޓަލުގައި އިންނެވީމާ، އަނެއް ދުވަހު އަނެއް ބޭފުޅާ އިންނެވީ ހުޅުމާލޭގައި ސައިފޮދު ހިއްޕަވާށެވެ. އެއް ބޭފުޅަކު ބައި ހައްދަވާފައި މަސްވެރިން ގާތަށް ވަޑައިގަތީމާ، އަނެއް ބޭފުޅާ ބައި ހައްދަވައިގެން ދަނޑުވެރިން ގާތަށެވެ.
މި އުޅެނީ 2024 ނުނިމިގެންނެވެ. އެކަމަކު، 2028 ގެ ރިޔާސީ ޓިކެޓުގެ ފޯރި އިދިކޮޅު އެންމެ ބޮޑު ޕާޓީ އެމްޑީޕީގައި އޮތީ ހެޔޮވަރަށް ހިފައިލާފައެވެ. އެ ވާދަވެރިކަމުގައި އެ ޕާޓީގެ ވެރިން އެ ތިބީ ކޯޅިކޯޅިއެވެ. އެކެއް އަނެކަކަށް ނުރުހުންވެފައެވެ.
ކުރިން އެ ހުރި ޖޯޝެއް މިހާރަކު ނެތެވެ. އެ ހިތްވަރެއް ވެސް ނެތެވެ. އެ ލަޝްކަރެއް ވެސް ނުފެނެއެވެ. އެ ވާހަކަ ކުރިން ވެސް ލިޔުނީމެވެ. އަލުން އެ ވާހަކަދައްކަން ޖެހުނީ ގާނޫނުއަސާސީއަށް ހަވަނަ އިސްލާހު ގެނައިމައި އެމްޑީޕީގެ މިހާރުގެ ލީޑާޝިޕުން ދެއްކެވި ވާހަކަފުޅުތަކުންނާއި މި ފެންނަ ބައިބައިވުމުގެ ސަބަބުންނެވެ. ޚުދުމުޚުތާރު ވަނީއޭ ވިދާޅުވެފައި ދެން ނުގޮތަކަށް ވިދާޅުވީ، 'އަހަރެމެން ދެން ކުރަންވީ ކީއްހެއްޔޭ'އެވެ. ކުރެވޭނީ ކީއްހެއްޔޭއެވެ.
އެމްޑީޕީގެ ރައީސާއި ޗެއާޕާސަން: -- ފޮޓޯ/ އެމްޑީޕީ
އެމްޑީޕީން 'ހަދާނެ ގޮތެއް' މަޝްވަރާކުރަނިކޮށް، އެ އިސްލާހުތަކުގެ މައްސަލަ ސުޕްރީމް ކޯޓަށް ހުށަހެޅީ ވެސް އެހެން ބޭފުޅެކެވެ.
'މި ތިބީ ހިތްހަމަނުޖެހިފައޭ' ބުނަން، ޖެހިގެން އައި ދުވަހު ނޫސްވެރިންގެ ބައްދަލުވުމެއް ނުބާއްވައެކޭ ނޫނެވެ. އެ ދުވަހު އެކަން ކުރީއިރު ހައެއްކަ މީހުން ނުކުމެ މުޒާހަރާއެއް ވެސް ނުކުރެއެކޭ ނޫނެވެ. އެކަމަކު، އިދިކޮޅު އެންމެ ބޮޑު ޕާޓީގެ ޒިންމާ އެ ވަރުން އަދާވޭހެއްޔެވެ؟ އެއީ، 60،000 މެންބަރުން ތިބި އެމްޑީޕީއަށް ވާނެ ވަރު ހެއްޔެވެ؟
އެތެރޭ ވާދަވެރިކަމުގައި ވެރިން ތާށިވެފައި
މަސް މާރުކޭޓަށް ވަޑައިގެން އެ ޕާޓީގެ ޗެއާޕާސަން ފައްޔާޒް އިސްމާއިލް މަސްވެރިންނާ ބައްދަލުކުރެއްވިއެވެ. އެ ވެރިންނާ އެކު، ފަރިއްކުޅުވައި ހެއްދެވިއެވެ. އެ ތަނުން އެ ޕާޓީގެ ރައީސް އަބްދުﷲ ޝާހިދެއް ނުފެނެއެވެ. އެ ކަމާ ބައެއް މީހުން ސުވާލުކުރިއެވެ.
ޝާހިދަށް އެކަން ނޭނގުނީއެވެ. ނޭނގޭތީ، އެ ކަމާ ނުރުހުންވެ، ސުވާލު ވެސް ކުރެއްވިއެވެ. އެ ހަރަކާތް ހިނގިކަން ޕާޓީގެ ރައީސަށް ނޭނގުނީމައެވެ.
އެ ނުރުހުންގަނޑު ނުނިމެނީސް، އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕުގައި ފައްޔާޒް ވަނީ 2028 ވަނަ އަހަރުގެ ރިޔާސީ އިންތިޚާބުގައި ވާދަކުރައްވަން ޕާޓީ ޕްރައިމަރީގައި ނުކުންނަވާނެކަން އިއުލާނުކުރައްވައިފައެވެ. އެއީ، ރަސްމީކޮށް އެ ޝައުގު ފާޅުކުރެއްވި ފުރަތަމަ ބޭފުޅާއެވެ. ކުރިން ހިނގި ހަރަކާތް ޝާހިދަށް ނޭނގި އޮތީ އެހެންވެ ކަމަށް ވެދާނެއެވެ.
ޖެހިގެން އައި ދުވަހު ޝާހިދު ވެސް ސައިހޮޓާތަކަށް ވަޑައިގަތެވެ. އެ ތަނަކުން ފައްޔާޒެއް ވެސް ނުފެނެއެވެ.
ކުރިން 2018 ވަނަ އަހަރު ވެސް ވެރިކަމަށް ވަޑައިގެންނެވުމުގެ ޝައުގުވެރިކަން ފާޅުކުރެއްވި ޝާހިދަކީ މި ފަހަރު ވެސް ރިޔާސީ ޓިކެޓަށް މަސައްކަތްކުރައްވާ ބޭފުޅެކެވެ. އެކަމަކު، ރަސްމީކޮށް އަދި އިއުލާނެއް ނުކުރައްވައެވެ. އެ ވާހަކަ ރަސްމީކޮށް ނުދައްކަވައެވެ.
"ޕާޓީގެ ރައީސްގެ ހައިސިއްޔަތުން އަޅުގަނޑުގެ މުޅި ފޯކަސްއަކީ ސަރުކާރު ޖަވާބުދާރީކުރުވުން،" 'ރާއްޖެ ޓީވީ'ގެ ޕްރޮގްރާމެއްގައި އެ ސުވާލުކުރީމާ ޝާހިދު ވިދާޅުވީ މިހެންނެވެ.
"އެއްވެސް ހާލެއްގައި އަޅުގަނޑު ގަސްތެއް ނުކުރަން 2028 ގެ ކަމެއް ނިންމާކަށް މި ވަގުތަކު. އިންތިޚާބުގެ ވާހަކަދައްކައިގެން އަމާޒުން ކައްސާލާކަށް ބޭނުމެއް ނޫން. ދުރުގައި އޮންނަ ކަމަކަށް ވިސްނައިގެން އަޅަންވާ ފިޔަވަޅު އޮޅޭނީ،"
ދެން ހުންނެވި މާލޭގެ މޭޔަރު އާދަމް އާޒިމް އެ ހުންނަވަނީ ސިޓީ ކައުންސިލަށް ބޮޑު މުސާރައިގައި އެމްޑީޕީން އެ ބޭފުޅާއާ އެއްބައިވާނެ އަށް ބޭފުޅުން 'ކޮންސަލްޓަންޓުން' ގޮތުގައި ނަންގަވައިގެންނެވެ. އެ ވާހަކަ ވިދާޅުވެވުނީ ވެސް އަމިއްލައަށެވެ.
ކުރީގެ ރައީސް އިބްރާހިމް މުހައްމަދު ޞާލިޙް ވިދާޅުވި ގޮތުން ނަމަ އިތުރު ދެ ބޭފުޅަކު ވެސް ޝައުގުވެރިވެލައްވައެވެ. ފަހަރުގައި އެ ދެ ބޭފުޅުންގެ ތެރޭގައި އެ މަނިކުފާނު ވެސް ހިމެނިދާނެއެވެ. ސާފުކޮށް ސުވާލަށް ޖަވާބުނުދެއްވާތީ އެ ކަން ވެސް ސާފެއް ނުވެއެވެ.
ވެރިކަމަށް ފައިނެންގެވުމަކީ މައްސަލައެއް ނޫނެވެ. އެއް ޕާޓީ ގިނަ ބަޔަކު ޝައުގުވެރިވީ ވަރަކަށް ޕާޓީގެ ފޯރި ގަދައީއެވެ. އެއީ ހަމަ ރަނގަޅު ކަމެކެވެ. އެކަމަކު، އެކެއް އަނެކެއްގެ ވާދަވެރިކަމުގައި އެކެއް އަނެކަކު ކިބައިން ހިތްވަރުލިބިގެން ހިންގި އެމްޑީޕީ ތާށިވެފައި އޮވެގެން ނުވާނެއެވެ. ޕާޓީގެ ހަރަކާތްތައް މަޑުޖެހިފައި އޮވެގެން ވެސް ނުވާނެއެވެ.
"މަގުމައްޗަށް ނުނުކުތަސް އެމްޑީޕީ ހިނގާ"
އެމްޑީޕީ ނުހިނގައޭ ބުނަނީ އާންމުންނެވެ. އެ ފިކުރުގައި ތިބި މީހުންނެވެ. އެ ވާހަކަ ފައްޔާޒަށް ވެސް އިވިވަޑައިގަންނަވައެވެ. އެ ސުވާލު ވެސް ވަރަށް ގިނައިން މީހުންނާއި ނޫސްވެރިން ކުރާ ކަމަށް އޭނާ ވިދާޅުވިއެވެ. ސަރުކާރަށް އަހަރުވުމާ ގުޅުވައި 'ސަން'އަށް ދިން އިންޓަވިއުގައި ވެސް އެ ސުވާލުކުރީމެވެ.
"އަޅުގަނޑު އަހާލަން ބޭނުންވާ ސުވާލެއް އަސްލު އެއީ ކޮން ގޮތެއްތޯ؟ އަޅުގަނޑަށް އަދި އެ ގޮތް ނޭނގިގެން މި އުޅެނީ،" އެ ސުވާލަށް ފުރަތަމަ ދިން ޖަވާބަކީ މިއެވެ.
ފައްޔާޒް ވިދާޅުވީ އެމްޑީޕީ ހިނގާ ކަމަށެވެ. ކުރިއަށްވުރެ ބާރަށް ހިނގާ ކަމަށެވެ.
އޭނާ ވިދާޅުވި ގޮތުގައި ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް ފުރަތަމަ އަހަރެއްހާ ދުވަހު އެމްޑީޕީ އޮތީ ހިމޭނުންނެވެ. ދޮޅު އަހަރެއްހާ ދުވަހު އެމްޑީޕީގައި ކުރަމުން އައި ޕާޓީ ރީސްޓްރަކްޗާކުރުމުގެ މަސައްކަތެވެ. މަގުމައްޗަށް ނުކުތީ މާ ފަހުން އިތުރު ގޮތެއް ނެތުނީމާ ކަމަށް އޭނާ ގަބޫލުކުރައްވައެވެ.
"ދޮޅު އަހަރެއްހާ ދުވަސް ވަންދެން ޕާޓީން މަސައްކަތްކުރައްވަމުން ގެންދެވީ ޕާޓީ ރީސްޓްރަކްޗާ ކުރެއްވުމުގެ މަސައްކަތް. އޭރަކު މަގުމަތީ ހަރަކާތްތަކެއް ނުހިނގާނެ. މަގުމަތީ ހަރަކާތްތައް އަނެއްކާ ވެސް ޕާޓީން ހިންގަން ފެށީ 2015 ވަނަ އަހަރުގެ ނޮވެމްބަރު ހިސާބުގައި އަޅުގަނޑު ހަނދާންވާ ގޮތުގައި،" އޭނާ ވިދާޅުވިއެވެ.
ފައްޔާޒްގެ ހިޔާލު މި ކަމުގައި ތަފާތެވެ. އޭނާ ގަބޫލުކުރައްވަނީ ނިމުނު މަޖިލީސް އިންތިޚާބުގެ ކެމްޕޭނަކީ ވެސް "ދުވަހަކު އެމްޑީޕީން ނުކުރާވަރުގެ" މަޖިލީސް ކެމްޕޭނެއް ކަމަށެވެ.
އެމްޑީޕީގެ ކޮންގްރެސްގައި އެ ޕާޓީގެ ކުރީގެ ރައީސް މުހައްމަދު ނަޝީދާއި ކުރީގެ ރައީސް އިބްރާހިމް މުހައްމަދު ޞާލިޙް އަދި އެ ޕާޓީގެ ޗެއާޕާސަން ފައްޔާޒް އިސްމާއިލް -- ފޮޓޯ/ އަވަސް
"އެ ކެމްޕޭން ނިންމާލާފައި އަޅުގަނޑުމެން ދަށްވެގެން ވަދެ، ދެ މަސް ދުވަސް ބަރާބަރު ވާނީ. ކުރިން ވެއްޖިއްޔާ ދޮޅު އަހަރު ނެގި ކަމެއް ދެ މަސް ދުވަސް ތެރޭ އަޅުގަނޑުމެން ނުކުމެ މަސައްކަތްކުރަމުން މި ދަނީ،" އޭނާ ވިދާޅުވިއެވެ.
"ހައްގުތަކެއް ހޯދުމަށް، އެހެން ގޮތެއް ނެތުނީމާ މަގުމައްޗަށް އަބަދު ވެސް އެމްޑީޕީން ނުކުންނަނީ،"
އެ ޕާޓީން ކުރާ މަސައްކަތަކީ ޕާޓީ އެކަތި ކުރުމެވެ. ބައިބައިވެގެން ދިޔަ މީހުންނާ މަޝްވަރާކުރުމެވެ. އިންތިޚާބުތަކުން ބަލިވި ސަބަބު ދެނެގަތުމެވެ. އެ ކަން ވަރަށް ބާރަށް ކުރާ ކަމަށް އެބަ ވިދާޅުވެއެވެ. އިތުރު ގޮތެއް ނެތުނީމާ ދެން ވެސް މަގުމަތީ ހަރަކާތްތައް ފުޅާވެ، ވަރުގަދަވާނެ ކަމަށް ފައްޔާޒް ގަބޫލުކުރައްވައެވެ.
ޖޯޝާއި ފޯރި އަލުން ގެނެވިދާނެތަ؟
އެމްޑީޕީގެ ޖޯޝާއި ފޯރި ކިޔަނީ ހަމައެކަނި މުޒާހަރާތަކަކަށް ނޫނެވެ. އެ ބާއްވާ ހަރުގެ ޖަލްސާތަކުގައި ވެސް ފޯރިއެއް ނުހުރެއެވެ. ދެތިން ދުވަހަކު މަޖިލީސް ދޮށަށް ވެސް އެއްވެއްޖެއެވެ. ވަޔަކު ނުހިފައެވެ. މީހަކު ނުތިބެއެވެ.
އެއީ، އެމްޑީޕީއަށް ބުނަން ލަދުގަންނަހާ މީހުން މަދެވެ. ޝާހިދެއް ފައްޔާޒެއް ވެސް ނުފެނެއެވެ.
"ކުރިން ދެފަޅިވެފައި އޮތް ޕާޓީއެއްގައި ފަސް ހަތަރު ފެކްޝަން ހަދައިގެން މަސައްކަތްކުރަން ވީމާ ދެން ކިހިނެއް ވާނީ؟ އެކަކު އަނެކަކަށް ޕްރައިމަރީގެ ކެމްޕޭންގައި އުޅުއްވަންޏާ ޕާޓީގެ ހަރަކާތްތައް ލީޑުކުރާނީ ކާކު؟ އެއީ އެވާ ގޮތަކީ،" އެ ޕާޓީގެ ކުރިން އުޅެފައި ނުކުތްތަނުން ބޭފުޅަކު ގަބޫލުކުރައްވާ ގޮތް ވިދާޅުވިއެވެ.
"އަވަހަށް ޕްރައިމަރީ ބާއްވަންވީ، އެކަން ނިންމާލަންވީ،"
ވަޔަކު ނުވެސް ހިފާނެއެވެ. ވެރިން ނޫނޭ ނޫނޭ ވިދާޅުވިޔަސް އުޅުއްވަނީ ކެމްޕޭންގައެވެ. ފޯކަސްއަކީ މުޅިން އިދިކޮޅުގެ ޒިންމާއޭ ވާޖިބޭ ވިދާޅުވިޔަސް އެ ބޭފުޅުންގެ ކަޅިތައް ހުރީ އިންތިޚާބަށެވެ. ލޯތައް ހުރީ ރިޔާސީ ޓިކެޓަށެވެ. ތައްޔާރުވަނީ ވެސް އެ ކަމަށެވެ. ހިމޭނުން ތިއްބަވައިގެން ކުރައްވަނީ އެ މަސައްކަތެވެ.
އެކަމަކު، ޗެއާޕާސަނަކަށް ހުންނެވި ފައްޔާޒުގެ ހިޔާލު މި ކަމުގައި ވެސް ތަފާތެވެ. އޭނާ ވިދާޅުވީ، ޕާޓީގައި ވަރުގަދަ އެއް ލީޑަރު ހުންނަވަން ނުޖެހޭ ކަމަށާއި ނުވެސް ހުންނާނެ ކަމަށެވެ. އެ ގޮތް ބޭނުން ވެސް ނުވާ ކަމަށް އޭނާ ވިދާޅުވިއެވެ.
"މިހާރު ކުރަމުން މިދިޔަ މަސައްކަތަކީ މިހާރަކު ޕާޓީއެއްގައި ނުހުންނާނެ ވަރުގަދަ އެއް ލީޑަރެއް. މިހާރު ޑިމޮކްރެޓިކް ހަމަތަކަކުން މި ޕާޓީ ހިނގަމުން މި ދަނީ. އެއީ، އެ ވަރުގެ ވަރުގަދަ ޝަހުސިއްޔަތެއް މި ޕާޓީއަކު މި ވަގުތު ކޮންމެހެން ނުހުންނާނެ،" ފައްޔާޒް ވިދާޅުވިއެވެ.
އެއީ ރަނގަޅު ގޮތް ކަމަކަށް އޭނާ ގަބޫލެއް ނުކުރައްވައެވެ. އެއީ، ހަދާނެ ގޮތެއް ވެސް ނޫނޭ އޭނާ ވިދާޅުވިއެވެ.
އެކަމަކު، އެމްޑީޕީ އެ ޕާޓީގެ އަސްލު ޖޯޝާއި ފޯރީގައި ނުހިނގަނީ ވެރިން އެތެރޭގައި ކޯޅިކޯޅި ތިއްބެވީމައެވެ. ދެ ފަޅިއަށް ފެޅިފައި އޮތް ޕާޓީއެއްގައި އިތުރު ފެކްޝަންތައް އޮތީމައެވެ. އެއް ބޭފުޅަކު އަނެއް ބޭފުޅަކާ ބޮޑު ވާދަވެރިކަމެއްގައި ތިއްބެވީމައެވެ. ޗެއާޕާސަން ހިންގަވާ ހަރަކާތްތައް ރައީސަށް އެނގިވަޑައިނުގަންނަވަންޏާ ފޯރިއެއް ނުހިފާނެއެވެ. ރައީސް ހިންގަވާ ހަރަކާތްތައް ޗެއާޕާސަނަށް އެނގިވަޑައިނުގަންނަވަންޏާ ވަޔަކު ނުހިފާނެއެވެ.
ޕާޓީ އެހާ ބޮޑަށް ބައިބައިވަނީ އެ ތަނުގައި އެންމެ ސީނިއާކޮށް ހުންނެވި ކުރީގެ ރައީސް ވަންހަނާވެ ހުންނަވާތީއެވެ. އެންމެ ދުވަސްވީ، އިސް އެއް ލީޑަރުގެ ހައިސިއްޔަތުން ދައްކަވަންޖެހޭ ލީޑާޝިޕު ނުދައްކަވާތީއެވެ. ޕާޓީގެ ކަމެއްގައި ނޫޅުއްވާތީއެވެ. ސަރުކާރު ޒިންމާދާރުކުރުވުމުގެ އެއްވެސް ކަމަކުން ނުފެނެއެވެ. ދަމަކުންބަޑިއެއް ޖަހާހެން އެއްޗެއް ވިދާޅުނުވެޔެކޭ ނޫނެވެ.
މި ބައިބައިވުން އެކަތިކުރަން އެމްޑީޕީން ޕްރައިމަރީ ބާއްވާފައި، ކޮންމެ ވެސް އެއް ބޭފުޅެއްގެ ފަހަތުގައި ޕާޓީ ރުކުރުވާލަން ޖެހެއެވެ. ޖޯޝާއި ފޯރި އަނބުރާ ގެނެވޭނީ އޭރުންނެވެ. އެހެން ކޯޅިކޯޅި ތިބެވޭކަށް ނެތެވެ.