ފަތުރުވެރިކަމުން ރާއްޖެއަށް ލިބޭ ހުރިހާ ބޭރު ފައިސާއެއް ރާއްޖޭގެ ބޭންކުތަކަށް ޖަމާކުރަންޖެހޭގޮތަށް ފައިސާއާ ބެހޭ ގަވާއިދެއް އެކުލަވައިލައިފިއެވެ.
މިއަދު ގެޒެޓުކޮށްފައިވާ މި ގަވާއިދުގައި ވާގޮތުން ފަތުރުވެރިކަމުގެ ދާއިރާގައި މަސައްކަތްކުރާ އަދި، މޯލްޑިވްސް އިންލެންޑް ރެވެނިއު އޮތޯރިޓީ (މީރާ)ގައި ރަޖިސްޓަރީ ކޮށްފައިވާ ހުރިހާ ފަރާތްތަކުން، އަލުން ރަޖިސްޓްރީ ކުރުމަށް ވަނީ 30 ދުވަސް ދީފައެވެ. އަދި އަލަށް މީރާގައި ރަޖިސްޓަރީވާ ފަރާތްތަކުން އެމްއެމްއޭގައި ރަޖިސްޓްރީ ކުރުމަށް 30 ދުވަހުގެ މުއްދަތެއް ވަނީ ދީފައެވެ.
ފަތުރުވެރިކަމުގެ ދާއިރާގެ މުދާ ވިއްކާ ފާރާތްތަކާއި ޚިދުމަތް ފޯރުކޮށްދޭ ފަރާތްތަކުން ފޯރުކޮށްދޭ މުދަލާއި ޚިދުމަތުގެ ތަފްސީލު ޖެހިގެން އަންނަ މަހުގެ 28ވަނަ ދުވަހުގެ ކުރިން އެމްއެމްއޭ އަށް ހުށަހަޅަން ޖެހޭކަމަށް މި ގަވާއިދުގައި ވެއެވެ.
ބޭންކަށް މި ފައިސާ ޖަމާކުރުމަށް ފަހު އެކަމުގެ މައުލޫމާތާއި ބޭންކުން އަންގާ އެހެން މައުލޫމާތު އޮތޯރިޓީން ކަނޑައަޅާ ގޮތެއްގެ މަތިން ހުށަހަޅަން ވާނެކަމަށް މި ގަވާއިދުގައި ވެއެވެ.