އެމެރިކާގެ ފުރަތަމަ ހައިޑްރޮޖަން ރެއިލް ކެލިފޯނިއާގައި ތަޢާރަފުކޮށްފި

އެމެރިކާގެ ފުރަތަމަ ހައިޑްރޮޖަން ރެއިލް ކެލިފޯނިއާގައި ތަޢާރަފުކޮށްފިއެވެ.

ކެލިފޯނިއާގެ ސަން ބަނާޑީނޯ ސިޓީގައި ތަޢާރަފްކުރި މި ޚިދުމަތަކީ އެމެރިކާގެ ފުރަތަމަ ހައިޑްރޮޖަން ބޭނުންކޮށްގެން ދުއްވާ ފަސިންޖަރުން އުފުލާ ރެއިލް ވޭއެވެ.

މިއީ ކެލިފޯނިއާއިން 2045 ވަނަ އަހަރަށް ކާބަން ނިއުޓްރަލް ވުމުގެ އަމާޒަށް ވާސިލުވުމަށް ކުރަމުންދާ މަސައްކަތުގެ ތެރެއިން ކުރެވުނު މުހިންމު ކަމެކެވެ.

ޒީމޫ (ޒީރޯ އެމިޝަން މަލްޓިޕަލް ޔުނިޓް) ނަމަކަށް ކިޔާ މި ރެއިލް އަކީ 20 މިލިއަން ޑޮލަރުގެ އަގުހުރި ރެއިލްއެކެވެ. މި ރެއިލްގައި ބޭނުންކޮށްފައިވަނީ ހައިޑްރޮޖަން ފިއުލް ސެލް އަދި ބެޓެރީ ބޭނުންކުރާ ހައިބްރިޑް ނިޒާމެކެވެ.

މި ރެއިލްގައި އެއްފަހަރާ 108 މީހުންނަށް އިށީދެގެން ދަތުރުކުރެވޭނެއެވެ. އަދި މި ރެއިލް ދުއްވާނީ "އެރޯ ކޮރިޑޯ" ނަމަކަށް ކިޔާ ނުވަ މޭލުގެ ދިގު މަގެއްގައެވެ.

ހައިޑްރޮޖަން ފިއުލް ސެލްތަކުން ހައިޑްރޮޖަން އަދި އޮކްސިޖަން މޮލެކިއުލްތައް އެއްކޮށްގެން ކަރަންޓު އުފައްދައެވެ. މީގެ ސަބަބުން ބޭރުވަނީ ހަމައެކަނި ފެނުގެ މާއްދާއެކެވެ.

މި ރެއިލް ބޭނުންކުރަން ފެށުމުން، ސަން ބަނާޑީނޯގެ ވައި ތަޣައްޔަރުވުން ކުޑަކުރެވި، މަގުތަކުގައި އުޅަނދުފަހަރު ދުއްވުމުގެ ސަބަބުން ކުރިމަތިވާ ދަތިތައް ކުޑަކުރެވޭނެ ކަމަށް ބައެއް ފަރާތްތަކުން ވަނީ ލަފާކޮށްފައެވެ.

އަދި މި ރެއިލް ދުއްވުމުން އާންމު ރެއިލްތަކާ އަޅާބަލާއިރު އަޑު މާ މަޑުވާނެކަން ވެސް ފާހަގަކުރެވެއެވެ.

މި ރެއިލް ބޭނުންކުރަން ފެށޭނީ 2025ވަނަ އަހަރުގައެވެ. އަދި މިއީ އެމެރިކާގެ ފެޑެރަލް ރެއިލްރޯޑް އެޑްމިނިސްޓްރޭޝަންގެ ޝަރުތުތައް ފުރިހަމަކުރާ އެމެރިކާގެ ފުރަތަމަ ފަސިންޖަރުން އުފުލާ ރެއިލް ކަމުގައިވާނެއެވެ.