މަޝްހޫރު ފިލްމީ ތަރި އަރުޖުން ކަޕޫރުގެ އެއްބަނޑު އެއްބަފާ ކޮއްކޮ އަންޝުލާ ކަޕޫރު ފިލްމީ ދާއިރާއަށް ނުކުންނަން ތައްޔާރުވަމުން އަންނަ ކަމަށް ރިޕޯޓުތައް ބުނެފިއެވެ.
މީޑިއާ ރިޕޯޓުތައް ބުނާގޮތުން އަންޝުލާ ފިލްމީ ދާއިރާއަށް ތައާރަފްވާނީ ޕްރޮޑިއުސަރު ކަރަން ޖޯހަރު އުފައްދާ ރިއަލިޓީ ޝޯ އަކުންނެވެ. މި ރިއަލިޓީ ޝޯއަކީ އެމެރިކާގެ މަޝްހޫރު ރިއަލިޓީ ޝޯ "ދަ ޓްރެއިޓާސް" އަސްލަކަށް ބަލައިގެން އުފައްދާ ވެބް ސީރީސްއެކެވެ.
އަންޝުލާ މީގެކުރިން މަސައްކަތް ކުރަމުން އައީ އާއްމުންގެ ތެރޭގައި ސޯޝަލައިޒް ވުމުގެ މުހިއްމުކަން އާއްމުންނަށް ހާމަކޮށްދީ ކޮންމެ ފަދަ ސިފައެއްގައި ހުއްޓަސް އާއްމުންގެތެރެއަށް ނުކުމެ ހަރަކާތްތެރި ވުމުގެ މުހިއްމުކަމާ ގުޅޭގޮތުން މީހުން ހޭލުންތެރި ކުރުވުމަށެވެ.
އުމުރުން 33އަހަރުގެ އަންޝުލާ އަކީ މަޝްހޫރު ޕްރޮޑިއުސަރު ބޮނީ ކަޕޫރުގެ ފުރަތަމަ ކައިވެންޏަށް ލިބުނު ހަމަ އެކަނި އަންހެން ދަރިފުޅެވެ. ކުރީގެ ބަތަލާ ސްރީ ދޭވީއާ ބޮނީ ކަޕޫރު ކައިވެނި ކުރުމާ އެކު އަރުޖުން އާއި އަންޝުލާ ދިރިއުޅެމުން ދިޔައީ މަންމަ މޯނާ ޝޯރީ ކަޕޫރާ އެކު ވަކިންނެވެ.
އަރުޖުން ކަޕޫރު ބައްޕަ ބޮނީ ކަޕޫރު އަދި ތިން އަންހެން ކޮއްކޮއާ އެކު--ފޮޓޯ/ޕިންކްވިލާ
މަންމަ މޯނާގެ ވަކިވެ ދިޔުމާ ގުޅިގެން އަރުޖުން އާއި އަންޝުލާގެ ހަޔާތަށް ވަރަށް ބޮޑު އެކަނިވެރިކަމެއް ލިބި ބައްޕަ ބޮނީއާ އޮތް ގުޅުން ވަރަށް ބޮޑަށް ހީނަރުވިއެވެ.
ނަމަވެސް ބޮނީ އާއި އަދި އެއްބަފާ ދެ އަންހެން ކޮއްކޮއާ ގާތް ގުޅުމެއް ބާއްވަން އަރުޖުން ފެށީ ބޮނީގެ އަންހެނުން ކުރީގެ ބަތަލާ ސްރީދޭވީގެ މަރުގެ ހާދިސާއަށް ފަހުއެވެ.
އަންޝުލާ ކަޕޫރު ފިލްމީ ދުނިޔެއަށް ތައާރަފްވުމަށް ތައްޔާރުވަމުން އަންނައިރު އެއްބަފާ ދެ އަންހެން ކޮއްކޮ އަދި އަރުޖުން އަކީ މިހާރު ފިލްމު އިންޑަސްޓްރީގައި މަސައްކަތް ކުރަމުން އަންނަ މީހުންނެވެ.