ދިވެހި ސަރުކާރާއި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާ ގުޅޭގޮތުން ނޫސްތަކުން ހަދާ ދޮގު ޚަބަރުތަކުގެ މައްސަލަ، މޯލްޑިވްސް މީޑިއާ ކައުންސިލް (އެމްއެމްސީ) އަށް ހުށަހަޅުއްވާނެ ކަމަށް، ރައީސް އޮފީހުގެ ކޮމިއުނިކޭޝަން މިނިސްޓަރު އިބްރާހީމް ޚަލީލް މިއަދު ވިދާޅުވެއްޖެއެވެ.
އެމްއެމްސީން ވަނީ ވޭތުވެދިޔަ އެއް އަހަރު އެ ކައުންސިލަށް ހުށަހެޅި ޝަކުވާތަކުގެ ތަފާސްހިސާބު މިއަދު އާއްމުކޮށްފައެވެ. މި ތަފާސްހިސާބުތަކުން ދައްކާގޮތުގައި އެ ކައުންސިލަށް ހުށަހެޅި މައްސަލަތަކުގެ ތެރެއިން 94 ޕަސެންޓް މައްސަލަ ހުށަހެޅީ ރައީސް އޮފީހުންނެވެ. އެއީ 74 ޝަކުވާއެވެ.
ބާކީ ހަ ޕަސަންޓު ޝަކުވާ އެހެނިހެން ފަރާތްތަކުން ހުށަހަޅާފައި ވާއިރު އެއީ، ފަސް ޝަކުވާއެވެ. އެންމެ ގިނަ ޝަކުވާ ހުށަހަޅާފައި ވަނީ، ދިޔަވަރު އޮންލައިނާ ގުޅޭ ގޮތުންނެވެ. މި ނޫހާ ގުޅޭގޮތުން 59 ޝަކުވަ ހުށަހަޅާފައި ވެއެވެ.
މި ޝަކުވާތަކާ ގުޅިގެން 30 ޝަކުވާއަށް ވަނީ ގޮތް ނިންމާފައެވެ. މީގެ ތެރެއިން ނޫހާ އެއްކޮޅަށް ނުވަ މައްސަލައެއް ނިންމާފައި ވާއިރު، 20 މައްސަލައެއް ނިންމާފައި ވަނީ ނޫހާ ދެކޮޅަށެވެ. އަދި ނުވަ ޝަކުވާއެއް ނުބެލުމަށް ކައުންސިލުން ވަނީ ނިންމާފައެވެ.
މީގެ އިތުރުން، "ދެންމެ"ގެ ނަމުގައި ހިންގާ އޮންލައިން ވެބްސައިޓުން އާންމު އިޖުތިމާއީ މިންގަނޑުތަކާ ޚިލާފަށް ލިޔުންތައް ޝާއިއުކުރަމުން ގެންދާތީ ވަނީ އިންޒާރުދީފައެވެ. އަދި އެއަށްފަހު ވެސް އެފަދަ ކަންކަން ތަކުރާރު ކުރުމުން "ދެންމެ" ވެބްސައިޓު ވަނީ ބްލޮކްކޮށްފައެވެ.
އެމްއެމްސީގެ ރައީސްކަން ވެސް ކުރައްވާފައިވާ ޚަލީލް "ސަން" އަށް ވިދާޅުވީ އެ ކައުންސިލްގެ ގާނޫނުގެ މަފުހޫމަކީ ވެސް ނޫސްތަކުން ދޮގު ހަދާ ނަމަ އެކަން ބަލައި ހަގީގަތް ހާމަކޮށްދިނުން ކަމަށެވެ.
އެ ގޮތުން ނޫސްތަކުން ދޮގެއް ހަދާނަމަ އެއީ ދޮގެއްކަން ނުވަތަ މައްސަލަ ހުށަހެޅި ފަރާތުން އެ ހުށަހެޅި މައްސަލައަކީ ދޮގެއްކަން އެމްއެމްސީއިން ހާމަ ކުރަން ޖެހޭ ކަމަށް ޚަލީލް ވިދާޅުވިއެވެ.
"މީޑިއާ ކައުންސިލުން އެކަމެއް ނުކޮށްދޭ. އެއީ ދޮގެއްކަން ނުވަތަ ތެދެއްކަން ހާމަކޮށްދޭން ޖެހޭ އެ ކައުންސިލުން،" ޚަލީލް ވިދާޅުވިއެވެ.
ދައުލަތުގެ ބަޖެޓުން ހަރަދު ކޮށްގެން ހިންގާ މީޑިއާ ކައުންސިލުގެ މައިގަނޑު މަގުސަދަކީ، މީޑިއާގެ މިނިވަންކަން ރާއްޖޭގައި ދެމެހެއްޓުމާއި އެ މިނިވަންކަމަށް އުނިކަން އަންނަ ކަންކަން ބަލައި ފިޔަވަޅު އެޅުމެވެ. އަދި މީޑިއާއިން އަމަލު ކުރަންވީ ހަމަތަކާއި، އެފަރާތްތަކުގެ އަޚްލާގީ މިންގަނޑުތައް އެކަށައެޅުމެވެ.