މަސްތުވާތަކެތީގެ ބާވަތެއް ކަމަށްވާ ކެނެބިސް ޓްރެފިކްކުރިކަމުގެ ކުށް ސާބިތުވެ، ދިވެހި ފިރިހެނަކު އެއްލައްކަ ރުފިޔާއިން ޖޫރިމަނާކޮށް އުމުރަށް ޖަލަށްލުމަށް ކްރިމިނަލް ކޯޓުން އިއްޔެ ހުކުމްކޮށްފިއެވެ.
މި މައްސަލައިގައި ކްރިމިނަލް ކޯޓުން ހުކުމްކޮށްފައިވަނީ، މުހައްމަދު ޝަބިމް، ވެލިދޫގެ، ޅ. ނައިފަރުގެ މައްޗަށެވެ.
ޕްރޮސިކިއުޓާ ޖެނެރަލް (ޕީޖީ) އޮފީހުން އޭނާގެ މައްޗަށް ދައުވާކޮށްފައި ވަނީ، މާޗު މަހުގެ 11ވަނަ ދުވަހު ފުލުހުން ވިލިމާލެ ޕެޓްރޯލްކުރަމުން ދަނިކޮށް، ޝަބިމްގެ އަމަލުތައް ހުރިގޮތުން މަސްތުވާއެއްޗެއް އޭނާގެ އަތުގައި ހުރިކަމަށް ތުހުމަތުކުރެވިގެން އޭނާ ފާސްކުރިކުރުމުންނެވެ.
އެގޮތުން އޭނާގެ ޖީބުން ފިލްމް ހުސްކުރި ދަޅުގައި 23.9 ގްރާމްގެ ކެނެބިސް ހުރިކަމަށް އެތަކެތީގެ ތަހުލީލު ރިޕޯޓުން ދައްކާފައިވެއެވެ. އަދި އޭނާގެ ކުޑަކަމުދާ އެއްޗެހި ކެނެބިސްއަށް ޕޮޒިޓިވްވުމުގެ އިތުރުން އެ ބޭނުންކުރާކަމަށް އޭނާ ވަނީ ފުލުހުންގެ ތަހުގީގަށް އިއުތިރާފު ވެސް ވެފައެވެ.
އެމީހެއްގެ އަތުގައި 14 ގްރާމަށްވުރެ ގިނަ އަދަދަކަށް ކެނެބިސް ހުރެއްޖެނަމަ ޓްރެފިކްކުރިކަމަށް ބެލެވޭނެއެވެ. ގާނޫނުގައި އޮންނަގޮތުން ކެނެބިސް ޓްރެފިކްކޮށްފިނަމަ އެއްލައްކަ ރުފިޔާއިން ފެށިގެން ދިހަ މިލިއަން ރުފިޔާއާ ހަމައަށް ޖޫރިމަނާކުރެވޭނެއެވެ.
ކްރިމިނަލް ކޯޓުގެ ހުކުމުގައި ބަޔާންކޮށްފައިވާ ގޮތުގައި ޝަބިމް ވަނީ އޭނާގެ ޖީބުގައި މަސްތުވާތަކެތި ހުރި ފިލްމް އޮންނަންވީ ސަބަބެއް އޭނާއަށް ނޭނގޭކަމަށާއި، އެއީ އޭނާއާ އެއްވެސް ގުޅުމެއް ނެތް އެއްޗެއް ކަމަށް ޝަރީއަތުގައި ބުނެފައެވެ.
އެހެންނަމަވެސް އެ މައްސަލައިގައި ޝަރީއަތުން ވަނީ ޝަބިމްގެ ޖީބުން ފެނުނު މަސްތުވާތަކެތީގެ ފިލްމް، އޭނާގެ ޖީބުން ފެނުނުކަމާމެދު އޭނާ އިންކާރު ނުކުރާކަން ފާހަގަކޮށްފައެވެ. އަދި އޭނާގެ ޖީބުގައި އެ އޮތްކަން ނޭނގޭކަން ފިޔަވާ އިތުރު އެއްވެސް ކަމެއް ދިފާއުގައި ފާހަގަކޮށްފައިނުވާކަން ޝަރީއަތުން ވަނީ ފާހަގަކޮށްފައެވެ.
މައްސަލައިގެ ސީންގައި ހަރަކާތްތެރިވި ދެ ފުލުހުންގެ ހެކިބަހުގައި އެމީހުން ފެނުމުން ޝަބިމްގެ ހަރަކާތްތައް އަވަސްވިކަމަށް ބުނެފައިވެއެވެ. ދެ ހެކިންގެ ހެކިބަހުގައި މަސްތުވާތަކެތި ފެނުނު ފިލްމް ހުސްކުރި ދަޅުގެ ކުލައާ ގުޅޭގޮތުން ވަނީ ތަފާތުކޮށް ހެކިބަސްދީފައެވެ. ނަމަވެސް އެއީ ޖައުހަރީ ފުށުއެރުމެއް ކަމަށް ބަލައިނުގަނެވޭނެކަމަށް ނިންމާ، ޝަރީއަތުން ބުނީ ދެ ހެކިން ވެސް ޝަބިމްގެ ޖީބުން އެ ފެނުންކަމަށް ބުނެފައިވާ ކަމަށެވެ.
މައްސަލައިގައި ހެކިތަކަށް ރިއާޔަތްކުރުމަށްފަހު، ޝަބިމްގެ މައްޗަށް ވަނީ ކެނެބިސް ޓްރެފިކްކުރިކަމަށް ނިންމާ، 25 އަހަރު ދުވަހުގެ މުއްދަތަކަށް (މުޅި އުމުރަށް) ޖަލަށްލާން ހުކުމްކޮށްފައެވެ. އަދި އެއްލައްކަ ރުފިޔާއިން ޖޫރިމަނާކުރުމަށްފަހު، އިއްޔެއިން ފެށިގެން އެއް އަހަރުތެރޭ އެ ފައިސާ މީރާއަށް ދައްކަން ޝަބިމްގެ މައްޗަށް ވަނީ ހުކުމްކޮށްފައެވެ.
މީގެއިތުރުން، ހުކުމުގެ ކުރިން އޭނާ ބަންދުގައި ހޭދަކުރި މުއްދަތު ޖަލު އަދަބުން އުނިކުރުމަށް ހުކުމުގައި ވެއެވެ. މި މުއްދަތު އުނިކުރުމުން އޭނާ ހުކުމް ތަންފީޒުކުރަން ޖަލުގައި ހޭދަކުރަންޖެހޭނީ ކިހާ ދުވަހެއްކަމެއް ފާހަގަކޮށްފައެއް ނުވެއެވެ.