މަސްތުވާތަކެތީގެ ވިޔަފާރި ކުރި ކަމަށް ތުހުމަތު ކުރެވޭ މައްސަލައެއްގައި ހޭޓީގެ ކުރީގެ ރައީސް މިޝެލް ޖޯސެފް މާޓެލީގެ މައްޗަށް އެމެރިކާއިން ދަތިކުރުމުގެ ފިޔަވަޅު އަޅައިފިއެވެ.
ހޭޓީގައި މެދުކެނޑުމެއްނެތި ކުރިއަށް ގެންދާ ހަމަނުޖެހުންތައް އިތުރަށް ފުޅާކުރުމުގައި އޭނާގެ ދައުރު ވަރަށް ބޮޑު ކަމަށްވެސް އެމެރިކާއިން ތުހުމަތުކުރެއެވެ.
އެމެރިކާގެ ޑިޕާޓްމަންޓް އޮފް ޓްރެޜަރީން އަންގާރަ ދުވަހު ނެރުނު ބަޔާނެއްގައި ބުނިގޮތުގައި މާޓެލީ ވަނީ ކޮކެއިން ހިމެނޭ ގޮތަށް ނުރައްކާތެރި މަސްތުވާތަކެތީގެ ވިޔަފާރި ކުރުމަށް މަގުފަހިކޮށްދިނުމަށް އޭނާގެ ނުފޫޒު ނަހަމަ ގޮތުގައި ބޭނުންކޮށްފައެވެ.
އެ ޑިޕާޓްމަންޓުން ބުނީ 2011 އާއި 2016 އާ ދެމެދު ހޭޓީގެ ރައީސްކަން ކުރެއްވި މާޓެލީ ވަނީ ހޭޓީގެ މަސްތުވާތަކެތީގެ ވިޔަފާރިވެރިންނާ އެކު މަސައްކަތްކޮށް، އެތައް ގޭންގުތަކެއް ސްޕޮންސާކޮށް، މަސްތުވާތަކެތީގެ ނާޖާއިޒު ފައިސާ ލޯންޑަރިންގައިވެސް ބައިވެރިވެފައެވެ.
"މިއަދު މާޓެލީއާ ދެކޮޅަށް އަޅާފައިވާ ފިޔަވަޅުން އެގެނީ އޭނާ އާއި އެހެން ކޮރަޕްޓް ސިޔާސީ ޝަޚްސިއްޔަތުތަކުން ހޭޓީގައި ހިނގަމުންދާ ހަމަނުޖެހުންތައް ދެމެހެއްޓުމަށް ބޮޑު ދައުރެއް އަދާކުރިކަން." ޓްރެޝަރީގެ އެކްޓިން އެންޑަ ސެކްރެޓަރީ ފޯ ޓެރަރިޒަމް އެންޑް ފައިނޭންޝަލް އިންޓެލިޖެންސް ބްރެޑްލީ ސްމިތުގެ ބަޔާނުގައި ވިދާޅުވިއެވެ.
އަންގާރަ ދުވަހު އަޅަފައިވާ ދަތިކުރުމުގެ ފިޔަވަޅުގެ ދަށުން މާޓެލީގެ އެމެރިކާގެ ހުރިހާ އެސެޓެއް ފްރީޒްކޮށް، އާންމުކޮށް އެމެރިކާ މީހުންނަށް އޭނާއާ މުއާމަލާތް ކުރުން މަނާކޮށްފައިވެއެވެ.
ހަތިޔާރު އެޅި ގޭންގުތަކާ ގުޅިގެން ފައިދާ ހޯދާ ކަމަށް ތުހުމަތުކޮށް މާޓެލީއާއި ހޭޓީގެ ކުރީގެ އިތުރު ދެ ބޮޑުވަޒީރަކާ ދެކޮޅަށް 2022 ވަނަ އަހަރު ކެނެޑާއިން ވެސް ވަނީ އެފަދަ ދަތިކުރުމުގެ ފިޔަވަޅުތަކެއް އަޅައިފައެވެ.
އެމެރިކާގެ އެންމެ ފަގީރު ގައުމު ކަމަށްވާ ހޭޓީގައި ގިނަ ދުވަސްތަކެއް ވަންދެން ގޭންގްތަކުގެ އަނިޔާވެރިކަން އޮތްއިރު، ހާލަތު އެންމެ ގޯސްވީ ފެބްރުއަރީ މަހު ހަތިޔާރުއެޅި ޖަމާއަތްތަކުން އޭރުގެ ބޮޑު ވަޒީރު އޭރިއަލް ހެންރީ އިސްތިއުފާ ދެއްވަން މަޖުބޫރު ކުރުވުމުންނެވެ.
ވެރިރަށް ޕޯޓްއޯ ޕްރިންސްގެ ގާތްގަނޑަކަށް 80 އިންސައްތަ ކުށްކުރާ ހަތިޔާރުއެޅި ޖަމާއަތްތަކުން ކޮންޓްރޯލް ކުރާއިރު، މީހުން މެރުމާ، ރޭޕްކުރުން، އަދި ރަހީނުކުރުންވެސް ހޭޓީގައި ވަނީ އާންމުވެފައެވެ.
ސިޔާސީ، އިޖުތިމާއީ އަދި އިގްތިސާދީ ހަލަބޮލިކަމުގެ ސަބަބުން އެ ގައުމަށް ހަމަޖެހުން ގެނައުމަށް ކުރާ ބައިނަލްއަގުވާމީ މަސައްކަތްތަކުގެ ތެރެއިން ސުލްހަ ގާއިމު ކުރުމަށް ކެންޔާގެ އެތައް ސަތޭކަ ފުލުހުންނެއް ހޭޓިއަށް ވަނީ ފޮނުވައިފައެވެ.
ގޭންގު ހަނގުރާމަތަކުގެ ސަބަބުން 578،000 އަށް ވުރެ ގިނަ ހޭޓީގެ އާންމުންގެ ގެއްލިފައިވާއިރު، 11.7މިލިއަން މީހުންގެ އާބާދީއެއް އޮންނަ ހޭޓީގެ ފަސް މިލިއަން މީހުންނަށް ވަނީ ބަނޑުހައިހޫނުކަމާ ކުރިމަތިލާންޖެހިފައި ކަމަށް އދ ން ބުނެއެވެ.