ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާ ބެހޭ ވަޒީރުކަމާ ހަވާލުވެވަޑައިގެން އާދަމް ޝަރީފް އުމަރު ހުންނެވުމަކީ މާލެ ސިޓީގެ ކަންކަން ކުރެއްވުމަށް ލިބުނު ވަރަށް ބޮޑު ފަސޭހައެއް ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.
ޕީއެސްއެމްގެ ޕްރޮގްރާމެއްގައި ރޭ ވާހަކަދައްކަވަމުން އާޒިމްވަނީ އާދަމް ޝަރީފުގެ މަސައްކަތްޕުޅަށް ވަރަށް ބޮޑަށް ތަޢުރީފުކުރައްވައި ވާހަކަދައްކަވާފައެވެ.
އާޒިމް ވިދާޅުވީ، ސީޓީ ކައުންސިލްގެ އެކި ކަންކަމާ ގުޅިގެން ކޮންމެ ގަޑިއެއްގައި ވެސް ވަޒީރާއި ފޯނުން ގުޅައި މަޝްވަރާ ކުރެވޭ ކަމަށެވެ. އަދި، ބައްދަލުކުރަންޖެހޭ ހާލަތްތަކުގައި އެއްވެސް އުނދަގޫ ކަމެއް ނެތި އެ ކަން ވެސް ކުރެވެމުންދާކަން މޭޔަރު ވަނީ ހާމަކުރައްވައިފައެވެ.
"ޚާއްޞަކޮށް ވަރަށް މެޗުއާކޮށް އަޅުގަނޑުމެން ކޮންމެ ގަޑިއެއްގައި މިނިސްޓަރާ ބައްދަލުވޭ. ކޮންމެ ގަޑިއެއްގައި މިނިސްޓަރަށް ފޯނުކުރެއްވޭ. ވަރަށް ފޯނަށް ޖަވާބުދެއްވާ. އަދި ވަކިން ޚާއްސަކޮށް ދެ ބޭފުޅަކު މާލޭ ސިޓީގެ ކަންކަމަށް އައްޔަނުކޮށްފައި ވެސް އެބަތިބި ފަސޭހަކޮށް ސަރުކާރާ ކަނެކްޓް ކޮށްލަން،" މޭޔަރު ޢާޒިމް ވިދާޅުވިއެވެ.
މާލެ ސިޓީގެ މޭޔަރުކަމަށް އާޒިމް އިންތިޚާބުވީ އިދިކޮޅު އެމްޑީޕީގެ ޓިކެޓުގައެވެ. ނަމަވެސް، އެ ކަމުގެ ސަބަބުން ސަރުކާރާ ގުޅިގެން މަސައްކަތް ކުރުމަށް އެއްވެސް ދަތިކަމެއް ނެތް ކަމަށް މީގެ ކުރިން ތަކުރާރުކޮށް އާޒިމް ވިދާޅުވިއެވެ.
މާލޭގެ މޭޔަރު އާދަމް އާޒިމް -- ފޮޓޯ/ އެމްޑީޕީ
މޭޔަރު އިތުރަށް ވިދާޅުވީ، އެމްޑީޕީގެ ޓިކެޓުގައި މޭޔަރު ކަމަށް ހޮވިވަޑައިގަތް ނަމަވެސް، ވަޒީރުގެ އެއްބާރުލެއްވުމާއި އެކު ސަރުކާރާ އެކު މަސައްކަތް ކުރެއްވުމަށް ވަރަށް ބޮޑަށް ފަސޭހަ ކަމަށެވެ.
މޭޔަރުގެ ވާހަކައިގައިވަނީ، އޭނާ އެދިވަޑައިގަންނަވާ ކަންކަން ފަސޭހަކަމާ އެކު ކޮށްދެއްވަމުން ގެންދަވާތީ، ވަޒީރަށް ޝުކުރު އަދާކުރައްވައިފައެވެ.
އެ ޕްރޮގްރާމްގައި ވަޒީރު އާދަމް ޝަރީފް ވިދާޅުވީ، އާޒިމަކީ ވާދަވެރި އިދިކޮޅު ސިޔާސީ ޕާޓީގެ ބޭފުޅެއް ނަމަވެސް، އެއްވެސް ކަމެއްގައި ހުއްޓުމެއް ދަތިކަމެއްނެތި ވަރަށް ރަނގަޅަށް މާލެ ސިޓީގެ މަސައްކަތްތައް ކުރިއަށް ދާ ކަމަށާއި، އެ ކަމުގައި އާޒިމްގެ އެއްބާރުލުން ލިބޭ ކަމަށެވެ.
"މާލެއަށް ގެންނަން ބޭނުންވާ ބަދަލުތައް ގެނައުމުގައި ސަރުކާރާ މާލެސިޓީ ކައުންސިލާ ގުޅިގެން މާލެ ސިޓީ ކައުންސިލަށް ލިބެންޖެހޭ އިހުތިސާސް ހަމަ އެ ފަރާތްތަކަށް އެ ހައްގު ލިބިގެން އިރާދަކުރެއްވިއްޔާމުން މާލޭގެ މައްސަަލަތައް ހައްލުކުރަމުން ދާނީ،" ވަޒީރު ވިދާޅުވިއެވެ.
ވަޒީރު ވިދާޅުވީ، މާލޭ ސިޓީކައުންސިލަށް ދިމާވާ އެކި ކަންކަމުގައި ސަރުކާރުގެ ތެރެއިން އެކިއެކި މުއައްސަސާތަކާ ގުޅިގެން ކަންކަން ފަހިކުރުމުގެ މާހައުލެއް ގާއިމުކޮށްދެއްވަން މަސައްކަތް ކުރައްވާނެ ކަމަށެވެ.
ކައުންސިލްތަކުގެ ހިންގުން ރަނގަޅުކުރުމުގެ ނިޔަތުގައި ވަކި މިނިސްޓްރީއެއް އުފެއްދީ ވެރިކަމާ ހަވާލުވެވަޑައިގަތުމަށް ފަހުގައި ރައީސް ޑރ. މުހައްމަދު މުއިއްޒެވެ.