މެދުރާއްޖެތެރޭގެ މަސްވެރިކަން މިހާރު ރަނގަޅުއިރު އިއްޔެ އެކަނި މޯލްޑިވްސް ފިޝަރީޒް ކޮމްޕެނީ ލިމިޓެޑް (މިފްކޯ)އިން 56 ޓަނު މަސް ކިރައިފައިވާކަމަށް އެ ކުންފުނިން ބުނެފިއެވެ.
މިފްކޯ އިން ބުނީ މެދު ރާއްޖެތެރޭގެ، ހާއްސަކޮށް މ. އަތޮޅުގެ މަސްވެރިކަން ރަނގަޅު ކަމަށެވެ. އެހެންވެ މިފްކޯގެ މަސްކިރާ ބޯޓުތައް މާލެ ސަރަހައްދަށާއި މ. އަތޮޅަށް ފޮނުވައިފައިވާކަމަށް ބުންޏެވެ.
އެ ކުންފުނިން ބުނީ މިހާރު ރާއްޖޭގެ މަސްވެރިކަން އެންމެ ރަނގަޅީ މ. އަތޮޅަށް ކަމަށާއި ދެކުނާއި އުތުރުގެ މަސްވެރިކަން ވެސް ރަނގަޅުވަމުން އަންނަކަމުގެ މަލަމަތި މިހާރު ފެންނަން ފަށައިފިކަަމަށެވެ.
ހަމައެއާއެކު އިއްޔެ އައްޑޫ ފިޝަރީޒް ކޮމްޕްލެކްސްއަށް ވަތް ދޯންޏަކުން 25 ޓަނުގެ ކިރާފައިވާ ކަމަށް މިފްކޯއިން ބުންޏެވެ. އަދި އިއްޔެ މުޅި ޖުމުލް 56 ޓަނު މަސް ކިރާފައިވާ ކަމަށާއި މިއީ މި ދޭތެރެއިން މަސް ނުބޭނި ހުރެ މަސްވެރިކަން އެއްކޮށް ދަށަށް ގޮސްފައިވާ އަދަދަށް ބަލާއިރު ވަރަށް ރަނގަޅު އަދަދެއް ކަމަށް ބުންޏެވެ.
މިފްކޯގެ އޭގެ ކުރީ ދުވަަސްތަކުގެ ތަފާސްހިސާބަށް ބަލާއިރު، 20 ޓަނާއި 30 ޓަނުގެ މަސް ވަނީ ކިރާފައެވެ.
މިފްކޯއިން ބުނީ ރާއްޖޭގެ މަސްވެރިކަން އަދިވެސް އެންމެ ރަނގަޅު ނޫން ކަމަށެވެ. ކުރިއަށް ހުރި ދުވަސްތަކުގައި ދެކުނުގެ މަސްވެރިކަން ރަނގަޅުވާނެކަމަށް ލަފާކުރެވޭ ކަމަށް އެ ކުންފުނިން ބުނެއެވެ.
މިހާރުގެ މާކެޓަށް ބަލާފައި މިފްކޯއިން މަސް ގަންނަނީ 16 ރުފިޔާއަށެވެ.
މަސްވެރިކަން ދަށްވެފައިވާއިރު މަސް ގަންނަން ނުލިބޭތީ މި ދުވަސްވަރު ރައްޔިތުންގެ ޝަކުވާ ވަނީ ބޮޑުވެފައެވެ. އަދި މިފްކޯގެ ފިހާރަތަކުންނާއި މާލޭގެ މަސް މާރުކޭޓުން ވެސް ކަނޑު މަސް ހުސްވެ މަހުގެ އަގު ވަނީ ވަރަށް ބޮޑަށް އުފުލިފައެވެ. މަސްް ގަންނަން ލިބުން ދަތިވެ ބާޒާރުގައި ރިހާކުރުގެ އަގުވެސް ވަނީ 390 އަށްވުރެ މައްޗަށް އަރައިގެން ގޮސްފައެވެ.