ކައުންސިލްތަކުގެ އިމާރާތްތައް ތަރައްގީ ކުރުމަށް ކުރެހުންތައް ފައިނަލްކޮށް، މިހާރު ކުރިއަށް ދަނީ ކޮންޓްރެކްޓް ހޯދުމުގެ މަސައްކަތް ކަމަށް ލޯކަލް ގަވަމަންޓް މިނިސްޓްރީން ބުނެފިއެވެ.
އެސްއެސްޓީވީގެ "ބާރު ހަތަރެއް" ޕްރޮގްރާމުގައި ވާހަކަދައްކަވަމުން ލޯކަލް ގަވަމަންޓް މިނިސްޓްރީގެ ސްޓޭޓް މިނިސްޓަރު މުހައްމަދު މާހިރު ވިދާޅުވީ 50 ކައުންސިލް އިދާރާއެއް ކޮންޓްރެކް ފައިނޭންސްގެ އުސޫލުން އިމާރާތް ކުރުމަށް ނިންމާފައިވާ ކަމަށެވެ.
"މިހާރު ހުރިހާ ކުރެހުންތައް ތައްޔާރުކޮށް، އިމާރާތްތައް އަޅާނެ ރަށްތައް ނިންމާ އިއުލާންކޮށް، މަސައްކަތް ދަނީ ކުރިއަށް. ކުރެހުންތައް މިހާރު ފައިނަލް ކުރެވި، ކޮންޓްރެކްޓް ހޯދުމުގެ މަސައްކަތް މިހާރު ކުރިއަށް ދަނީ." މާހިރު ވިދާޅުވިއެވެ.
މާހިރު ވިދާޅުވީ 106ވަރަކަށް ކައުންސިލްގެ އުމްރާނީ ތަރައްގީގެ މަސައްކަތް މިއަހަރުތެރޭ ފެށޭނެކަމަށެވެ.
ރަށްރަށުގެ މަގުބައްތިތައް ސަލާމަތީ މިންގަނޑުތަކަށް ފެއްތުމުގައި ދިމާވާ ގޮންޖެހުންތަކާ ގުޅެގޮތުން ވާހަކަދައްކަވަމުން މާހިރު ވިދާޅުވީ ރަށްރަށުގައި ހުރި 95 އިންސައްތަ މަގުބައްތި ހުރީ ރައްކާތެރިގޮތަށް ނޫންކަމަށެވެ.
އޭނާ ވިދާޅުވީ މިފަދަ މަގުބައްތިތަކުގެ ކޮންމެ ހޮޅިދަނޑިއެއްގެ މީޓަރުތައް ބަދަލުކޮށް، ގިނަ ރަށްރަށުގައި ހުރީ އަލުން ކޭބަލް އަޅަން ޖެހިފައި ކަމަށެވެ.
މާހިރު އިތުރަށް ވިދާޅުވީ ގިނަ ކައުންސިލްތަކުގައި މިފަދަ ބޮޑު މަޝްރޫއުއެއް ކުރިއަށް ގެންދަން މާލީ ގާބިލިއްޔަތު ކަމެއް ނުހުއްނާނެ ކަމަށް ގަބޫލުކުރައްވާ ކަމަށާއި މިހާރު މާލީ ހާލަތު އޮތް ގޮތުން، އެންމެ އުނދަގޫ ކަމަކީ ޚަރަދުތައް ހަމަޖެއްސުން ކަމަށެވެ.
ނަަމަވެސް މިހާރު ފިނޭންސް މިނިސްޓްރީގެ އިތުރުން ކަމާބެހޭ އެހެން އިދާރާތަކާއެކު މާލީ ގާބިލްކަން ހޯދުމަށް މަސައްކަތް ކުރުމަށް މަޝްވަރާތައް ކުރަމުން އަންނަ ކަމަށް މާހިރު ވިދާޅުވިއެވެ.
އަދި ފައިސާގެ އިންތިޒާމު ހަމަޖެހުނުހާ އަވަހަކަށް މަގުބައްތިތަކުގެ މައްސަލަ ހައްލުކުރުމުގެ އަމަލީ މަސައްކަތް ފަށާނެކަމަށް އޭނާ ވިދާޅުވިއެވެ.
ރަށްރަށުގެ މަގުބައްތި ރައްކާތެރިކަމުގެ މިންގަނޑަށް ފައްތަން ކައުންސިލްތަކަށް ދިން މުއްދަތު ހަ މަހަށް އިތުރުކޮށްފައިރު، މައްސަލަ ހައްލުނުކޮށްފި ނަމަ ފެނަކައިން ވަނީ އެ މަގުބައްތިތަކަށް ކަރަންޓް ނުދޭން ނިންމާފައެވެ.
ރަށްރަށުގެ މަގުބައްތިތައް ރަނގަޅުކުރުމަށް 85 މިލިއަން ރުފިޔާ ޚަރަދުވާނެކަމަށް ލޯކަލް ގަވަމަންޓް މިނިސްޓަރު އާދަމް ޝަރީފް ވަނީ މީގެ ކުރިން ވިދާޅުވެފައެވެ.
އަދި މިކަން ކުރުމަށް ވަގުތާއި ފައިސާ ވެސް ބޭނުން ވާކަމަށާއި ރަށު ކައުންސިލްތަކަށް ދިމާވެފައިވާ މިމައްސަަލަ ހައްލު ކުރެވެންދެން އެ ވުޒާރާއިން މިކަމުގައި މަސައްކަތް ކުރާނެ ކަމަށް މިނިސްޓަރު ވިދާޅުވިއެވެ.
ފެނަކައިން ބައެއް ރަށްރަށުގެ މަގުބައްތިއަށް ކަރަންޓު ދޫކުރުން ހުއްޓާލާނެ ކަމަށް ބުނީ، ރ. އުނގޫފާރުގައި މަގުބައްތިއަކުން ކުޑަކުދިންތަކެއް ކަރަންޓުގައި ޖެހުނު ހާދިސާގައި ޒުވާނަކު ނިޔާވުމާ ގުޅިގެން އެ ކޯޕަރޭޝަނުން ރަށްރަށުގެ މަގުބައްތީގެ ހާލަތު ބެލުމަށް ފަހުގައެވެ.