ދުވާލުދާ ހަތަރު ދަމު އެކި މަސައްކަތްތަކުގައި އަވަދިނެތި އުޅުމަށްފަހު އެއްބަޔަކަށް ރޭގަނޑުގެ ނިދި ފަސޭހައިން ލިބޭއިރު އަނެއް ބަޔަކީ އަރާމު ނިންޖަކުން ނިދާލުމަށް ބޮޑު ހަނގުރާމައެއް ކުރާ ބައެކެވެ.
އެމެރިކާގެ ސެންޓަ ފޯ ޑިޒީޒް ކޮންޓްރޯލް އެންޑް ޕްރިވެންޝަންއިން ކުރި ދިރާސާއެއް ދައްކާ ގޮތުގައި އެ ޤައުމުގެ 50 އާއި 70 މިލިއަނާ ދެމެދުގެ މީހުންނަކީ ދާއިމީ ނިދީގެ މައްސަލަތައް ހުންނަ މީހުންނެވެ.
ނަފްސާނީ އަދި ޖިސްމާނީ ދުޅަހެޔޮކަމަށް މަދުވެގެން ހަތް ގަޑިއިރުގެ ނިދި ލިބުމަކީ ކޮންމެހެންވެސް މުހިއްމު ކަމެކެވެ. ހާއްސަކޮށް ބަރުދަން ލުއިކުރަން މަސައްކަތް ކުރާނަމަ މިއީ ކޮންމެހެންވެސް ސަމާލުކަންދިނުން މުހިއްމު ކަމެކެވެ.
ދުޅަހެޔޮ ނިންޖެއް ހަށިގަނޑަށް ހޯދައި ދިނުމަކީ ހާސްކަމުން ތިމާ ދުރުކޮށްދީ، ހަށިގަނޑުގެ މެޓަބޮލިޒަމް ރަނގަޅުކޮށް، ސިއްހީގޮތުން ގިނަ ގުނަ ފައިދާތަކެއް ދާއިމަށް ހަށިގަނޑަށް ލިބުމަށް މަގުފަހިކޮށްދޭނެ ކަމެކެވެ. ނިދުމަކީ އުނދަގޫކަމެއް ނަމަ އެކަމަށް ހައްލެއް ހޯދުމަށް ފަސޭހައިން ނިދާލެވޭނެ ގޮތަކަށް ދުވަހުގެ ތާވަލު ތައްޔާރުކޮށްލެވިދާނެއެވެ.
ރޭގަނޑު ފަސޭހައިން ނިދާލުމަށް ތައްޔާރުވުމަށް މުޅި ދުވަހުގެ ތާވަލު ހާއްސަ ގޮތަކަށް ތައްޔާރުކޮށްލެވިދާނެ--ފޮޓޯ/ޕިންޓްރެސްޓް
އެ ތާވަލުގައި ހިމަނާ ކަންކަން ވަރަށް ހަރުދަނާކަމާ އެކު ފުރިހަމަކޮށް ގަވައިދުން އެކަން ކަމަށް ސަމާލުކަން ދެވިއްޖެނަމަ ފަސޭހައިން ނިދާލުމުގެ އާދަ ހަށިގަނޑުގައި އަށަގަންނަން މާގިނަ ދުވަހެއް ނުނަގާނެއެވެ.
މިގޮތުން ތައްޔާރުކުރާ ތާވަލުގައި ހިމަނާލެވިދާނެ ބައެއް ކަންތައްތަކުގެ ތެރޭ މެޑިޓޭޓް ކުރުން، ލުއި ކަސްރަތެއް ނުވަތަ ޔޯގާ ހެދުން، އެއްވެސް ކަހަލަ މަސައްކަތެއް ނުވަތަ ކުޅިވަރުގެ ހަރަކާތެއް ކޮޓަރީގައި ނުކުރުން، ބަދިގޭގެ މަސައްކަތްތައް އަވަހަށް ނިންމާލުން، ނިދުމުގެ ކުރިން ނޭވާލުމުގެ ހާއްސަ ކަސްރަތެއް ކޮށްލުން އަދި ނިދާ ކޮޓަރި ހިތްގައިމު ގޮތަކަށް ތައްޔާރުކޮށްލުން ހިމެނެއެވެ.
މި ދެންނެވުނު ކަންކަމުގެ ސަބަބުން ތިމާގެ ނަފުސަށް ހިތްހަމަޖެހުމެއް ލިބި ސިކުނޑިއަށް ލުއިވުމުގެ އިތުރުން ރޭގަނޑުގެ ނިދި ހޯދަން ތިކުރާ ހަނގުރާމަ ފަތަހަކޮށްދިނުމަށް އެހީތެރިވެދޭނެއެވެ.