ރާއްޖޭގެ ނޫސްވެރިން ތަމްރީނު ކުރުމަށް ފުރުސަތުތައް ހޯދައިދިނުމަށްޓަކައި، މޯލްޑިވްސް މީޑިއާ ކައުންސިލް (އެމްއެމްސީ)އިން ރާއްޖޭގައި ހުންނަ ޕާކިސްތާން ހައި ކޮމިޝަނާ މިއަދު މަޝްވަރާކޮށްފިއެވެ.
އެމްއެމްސީން ބުނީ، ދިވެހި ނޫސްވެރިން ތަމްރީނު ކުރުމަށް އަންނަ މަހު ޕާކިސްތާނަށް ފޮނުވުމަށް ހަމަޖެހިފައިވާ ކަމަށް އެ ބައްދަލުވުމުގައި ހައިކޮމިޝަނަރު ވައިސް އެޑްމިރަލް (ރިޓަޔާޑް) މުޙައްމަދު ފައްޔާޒު ގިލާނީ ވިދާޅުވިކަމަށެވެ.
އެ ތަމްރީނުގައި ބައިވެރިވާ ނޫސްވެރިން ޕާކިސްތާނުގެ ބައެއް މީޑިއާ ހައުސްތަކަށް ޒިޔާރަތްކުރުމުގެ އިތުރުން ނޫސްވެރިކަމާއި މީޑިއާ ދާއިރާގެ ސެޝަންތަކުގައި ބައިވެރިވާނެ ކަމަށް އެމްއެމްސީން ބުންޏެވެ.
މިއަދު އެމްއެމްސީއާއި ޕާކިސްތާން ހައި ކޮމިޝަނާއެކު ބޭއްވި ބައްދަލުވުމުގެ ތެރެއިން --- ފޮޓޯ/ މޯލްޑިވްސް މީޑިއާ ކައުންސިލް
މި މަޝްވަރާ ބައްދަލުވުމުގައި، އެމްއެމްސީއާއި ޕާކިސްތާނުގެ މިނިސްޓްރީ އޮފް އިންފޮމޭޝަން އެންޑް ބްރޯޑްކާސްޓިން ގުޅިގެން މަސައްކަތް ކުރުމަށް އެއްބަސްވުމުގައި ސޮއިކޮށްދެއްވާނެ ކަމުގެ ޔަގީންކަން ވެސް ޕާކިސްތާނުގެ ހައިކޮމިޝަނަރު ދެއްވާފައިވާކަން އެމްއެމްސީން ފާހަގަކުރިއެވެ.
އެމްއެމްސީގެ ފަރާތުން އެ ބައްދަލުވުމުގައި ބައިވެރިވެވަޑައިގަތީ، އެ ކައުންސިލުގެ ރައީސް އަޙްމަދު މުޞްތަފާ، މެންބަރު އަލީ ނިޝާން، މެންބަރު މުޙައްމަދު އަފްރާހް އަދި ކައުންސިލުގެ ސެކްރެޓަރީ ޖެނެރަލް ޑރ. އިބްރާހީމް ސަމީރެވެ.
ޕާކިސްތާން އެމްބަސީގެ ފަރާތުން މި ބައްދަލުވުމުގައި ބައިވެރިވެވަޑައިގަތީ، ހައިކޮމިޝަނަރާއި ޑެޕިއުޓީ ހެޑް އޮފް މިޝަން ޒުލްޤަރްނައިން އަޙްމަދެވެ.