މީޑިއާތަކަށް މާލީ މިނިވަންކަން ހޯދުމަށް، ޤައުމީ، އިދާރީ އަދި ފަރުދީ ފެންވަރުގައި މަސައްކަތް ކުރަންޖެހޭ ކަމަށް މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސް އަޙްމަދު މުސްތަފާ މިއަދު ވިދާޅުވެއްޖެއެވެ.
ދުނިޔޭގެ ނޫސްވެރިކަމުގެ މިނިވަންކަމުގެ ދުވަހާ ގުޅިގެން ދެއްވި ޚިޠާބުގައި މުސްތަފާ ވިދާޅުވީ، ނޫސްވެރިކަމުގެ މިނިވަންކަން ރާއްޖޭގެ ޤާނޫނުއަސާސީން ކަށަވަރުކޮށްދީފައިވީ ނަމަވެސް، ނޫސްވެރިންނާއި މީޑިއާތަކަށް އަބަދު ވެސް ގިނަގުނަ ގޮންޖެހުންތައް ކުރިމަތިވާ ކަމަށެވެ.
"ޤާނޫނީގޮތުންނާއި އެހެނިހެން ގޮތްގޮތުން ދިމާވާ އެކިއެކި ހުރަސްތަކާއި، ނޫސްވެރިންނަށް އަނިޔާކުރުމާއި، ފުރައްސާރަކޮށް އިންޒާރުދިނުންފަދަ ކަންކަން ހުއްޓާލައިގެން މެނުވީ ޑިމޮކްރަސީގެ މި މުހިއްމު އަސާސް ޤައުމުގައި ނޯންނާނެކަން އަޅުގަނޑުމެން އެންމެން ވެސް ގަބޫލުކުރަންޖެހޭ،" އޭނާ ވިދާޅުވިއެވެ.
މުސްތަފާ ވިދާޅުވީ، ނޫސް އިދާރާތަކުގެ މާލީ މިނިވަންކަން އޮންނަ މިންވަރެއްގެ މައްޗަށް އެ މީޑިއާތަކުގެ މިނިވަންކަން ބަރޯސާ ކުރަންޖެހޭ ހާލަތު ކޮންމެ ވެސް މިންވަރަކަށް ތަޖުރިބާ ކުރަންޖެހޭކަމީ ގަބޫލުކުރަންޖެހޭ ހަގީގަތް ކަމަށެވެ. އަދި، މިކަމަށް ދައުލަތުގެ ހުރިހާ ބާރުތަކަކުން ހާއްސަ ނަޒަރިއްޔާތެއް ބެހެއްޓުން މުހިންމުކަމުގައި ދެކޭ ކަމަށް މުސްތަފާ ވިދާޅުވިއެވެ.
އޭނާ ވިދާޅުވީ، ނޫސްވެރިކަމުގެ މިނިވަންކަމުގެ ދުވަސް ފާހަގަކުރާއިރު ދިވެހި ނޫސްވެރިންނާއި މީޑިއާތަކަށް މާލީ މިނިވަންކަން ހޯދުމަށް، ޤައުމީ، އިދާރީ އަދި ފަރުދީ ފެންވަރުގައި ވެސް ގިނަގުނަ މަސައްކަތްތަކެއް ކުރަންޖެހޭ ކަމަށެވެ. އަދި، ނޫސްވެރިކަމުގެ އެންމެ މައިގަނޑު އަސާސްތައް ކަމުގައިވާ ތެދުވެރިކަމާއި ޒިންމާދާރުކަމާ އެކު ޚަބަރު ފެތުރުމުގައި ނޫސްވެރިން ދެމިތިބުމަށް އެންމެ ބޮޑު ބާރެއް ނޫސްވެރިންނަށް ލިބޭނީ، އެ މީހުންގެ މާލީ މިނިވަންކަން ހޯދުމަށް އަހަންމިއްޔަތުކަން ދީގެންކަމަށް ވެސް އޭނާ ވިދާޅުވިއެވެ.
"ދިވެހިރާއްޖެއިން މަރާލާފައިވާ ދެ ނޫސްވެރިންނާއި، ފަލަސްތީނުގެ ޣައްޒާއިން މަރާލާފައިވާ އެތަކެއް ނޫސްވެރިންނަށް އިންސާފު ނުލިބި ހޭދަވާ ކޮންމެ ދުވަހަކީ ވެސް، މުޅި ދުނިޔޭގެ ނޫސްވެރިކަމަށް ވެސް ލިބޭ އިއާދަނުކުރެވޭ ބޮޑު ގެއްލުމެއްކަމުގައި އަޅުގަނޑު ދެކެން،" އޭނާ ވިދާޅުވިއެވެ.
މި އަހަރުގެ ނޫސްވެރިކަމުގެ މިނިވަންކަމުގެ ދުވަހުގެ ޝިއާރު، "ތިމާވެށީގެ ކާރިސާއާ ކުރިމަތިލާއިރު ނޫސްވެރިކަން" އަލިއަޅުވައިލާ މުސްތަފާ ވިދާޅުވީ މި ޝިއާރު ބިނާކޮށްފައިވަނީ، މިހާރު މުޅި ދުނިޔެއަށް ކުރިމަތިވަމުންދާ ތިމާވެށީގެ ބޮޑެތި މައްސަލަތަކާމެދު ނޫސްވެރިންނާއި ނޫސްވެރިކަމުގެ ތެރެއިން މައުލޫމާތު ފެތުރުމާއި ހޭލުންތެރިކުރުމުގެ މައްޗަށް ކަމަށެވެ.
މި އަހަރަކީ ދުނިޔޭގެ ކަނޑުގެ ލޮނުގަނޑު އާދަޔާޚިލާފަށް ހޫނުވެ، އޭގެ ގެއްލުމާއި ނުރައްކާ ރާއްޖެއަށް ވެސް ކަންބޮޑުވާ ދަރަޖައަކަށް އޮތް އަހަރެއްކަމުގައި ކަމާގުޅޭ ތަޖުރިބާކާރުން ފާހަގަކޮށްފައިވާ ކަމަށާއި އެހެންކަމުން މިއަދު ރާއްޖެއަށް ދިމާވެފައިވާ ތިމާވެށީގެ ނުރައްކާތެރި ކާރިސާއާއި، އޭގެ ސަބަބުން ތިމާވެށީގެ ގޮތުންނާއި އިޤުތިޞާދީގޮތުން ކުރިމަތިވެދާނެ ކަންކަމާމެދު، ފުންކޮށް ދިރާސާކޮށް، މޫސުމީ ބަދަލުތަކާމެދު މުޅި މުޖުތަމަޢު ހޭލުންތެރި ކުރުމަށް މަސައްކަތް ކުރުމަކީ ދިވެހި މީޑިއާތަކާއި ނޫސްވެރިންގެ ބޮލުގައި މިއަދު އެޅިފައިވާ ވަރަށް ބޮޑު ޒިންމާއެއްކަމުގައި މުސްތަފާ ވިދާޅުވިއެވެ.