އައްޑޫ ސިޓީގެ މިސްކިތަކަށް ބޮޑުކަމުދިޔަ މައްސަލައަކާ ގުޅިގެން މިިދިޔަ ބުރާސްފަތި ދުވަހު ފުލުހުންގެ ބެލުމުގެ ދަށަށް ގެންދިޔަ މީހާ ދޫކޮށްލީ އޭނާގެ ސިއްހީ ހާލަތު ހުރިގޮތުން ކަމަށް ފުލުހުން މިއަދު ބުނެފިއެވެ.
އައްޑޫގެ މިސްކިތަކަށް ބޮޑުކަމުދިޔަ މައްސަލައެއްގެ އިތުރުން ދެ މިސްކިތަކަށް ގެއްލުންދިން މައްސަލައަކާ ގުޅިގެން ފުލުހުންގެ ބެލުމުގެ ދަށަށް ގެންދިޔައީ 47 އަހަރުގެ ދިވެހި ފިރިހެނެކެވެ.
ފުލުހުންގެ މީޑިއާ އޮފިޝަލް މިއަދު ސަން އަށް ވިދާޅުވީ އެ މީހާގެ ސިއްހީ ހާލަތު ހުރިގޮތުން ފުލުހުންގެ ބަންދުގައި ބަހައްޓައިފިނަމަ އޭނާއަށް ގެއްލުމެއް ލިބިދާނެތީ ޑޮކްޓަރުންގެ ލަފާގެ މަތިން އެ ދުވަހު އޭނާ އާއިލާއާ ހަވާލު ކޮށްފައިވާ ކަމަށެވެ.
ސަން އަށް އެނގިފައިވާ ގޮތުގައި އެ މީހާއަކީ ނަފްސާނީ ބަލިތައް ހުރެގެން ބޭސް ކުރަމުން ދާ މީހެކެވެ.
މިސްކިތްތަކުގެ ހުރުމަތް ކެނޑުމުގެ ގިނަ މައްސަލަތަކެއް ވަނީ މި ފަހުން ފެންމަތިވެފައެވެ. އެގޮތުން މާލޭގެ މިސްކިތްތަކަށް ކުޑަކަމު ގޮސް، ހަތިމަކަށް ރަތް ކުޅު ޖެހި މީހަކު ވެސް ފުލުހުން ހައްޔަރުކޮށްފައިވެއެވެ. އެ މީހާގެ މައްޗަށް، އާންމު މަސްލަހަތަށް ގެއްލުން ހުރި ކަމެއް ކުރުމުގެ ދެ ދައުވާ ސާބިތުވާ ކަމަށް ނިންމައި ކްރިމިނަލް ކޯޓުން ވަނީ އޭނާ އެއް މަހާއި 19 ދުވަހަށް ޖަލަށް ލުމަށް ހުކުމް ކޮށްފައެވެ.