ދިރާގު ދިވެހި ޕްރިމިއާ ލީގުގައި އަލީ އަޝްފާގު (ދަގަނޑޭ)އާއެކު ޓީސީން ކުޅުނު ފުރަތަމަ މެޗުގައި އެޓީމުން ބޮޑު ތަފާތަކުން ފ. ނިލަންދޫ ބަލިކޮށްފިއެވެ.
ގައުމީ ފުޓުބޯޅަ ދަނޑުގައި ގިނަ އަދަދެއްގެ ނިލަންދޫ ސަޕޯޓަރުންނާއެކު މިރޭ ކުޅުނު މެޗުން ޓީސީ މޮޅުވީ 6-1ގެ ނަތީޖާއަކުންނެވެ.
މިދިޔަ އަހަރު ދިވެހި ޕްރިމިއާ ލީގުގައި ނިއު ރޭޑިއަންޓް ސްޕޯޓްސް ކްލަބަށް ކުޅުނު ދަގަނޑޭ ޓީސީއަށް ބަދަލުވީ މި އަހަރު މާލޭ ލީގުގައިވެސް ނިއުއަށް މޮޅު ކުޅުމެއް ދެއްކުމަށްފަހުގައެވެ.
ޓީސީން މިރޭ ނެރުނު ފުރަތަމަ 11ގައި ދަގަނޑޭ ހިމަނާފައިވާ އިރު، އޭނާ ވަނީ މެޗުގައި ދެ ގޯލްވެސް ޖަހައިފައެވެ. މެޗުގެ ފުރަތަމަ މިނެޓުން ފެށިގެންވެސް ޑޮމިނޭޓްކޮށްގެން ގުޅުނީ ޓީސީންނެވެ. ކުރިއަށް ޖެހި އެޓޭކިންގެ ގޭމެއް ޓީސީން ކުޅުނު އިރު، ނިލަންދޫގެ ގިނަ ކުޅުންތެރިންތަކެއް ޑިފެންސް ކުރިތަން ފެނިގެންދިޔައެވެ.
މެޗުގެ ފަސް ވަނަ މިނެޓުގައި ޓީސީން ލީޑު ނެގިއެވެ. އަރިމަތިން އަހުމަދު ފައްރާހު (ފައްރަ) ނެގި ހުރަސް ގޯލް ތެރެއަށް ވައްދާލީ އިޝާން އިބްރާހީމް (ސައްޓު)އެވެ. އޭގެ އަށް މިނެޓް ފަހުން ދަގަނޑޭ އޭނާ ޓީސީ ޖާޒީގައި ޖެހި ފުރަތަމަ ގޯލް ޖެހިއެވެ. ޓީސީގެ ޑިފެންޑަރު އަލާ ނަސްރު ކުރިއަށް ދިން ބޯޅައަށް ދުވެ ދަގަނޑޭ ބޯޅަ ގޯލަށް ވައްދާލީ ނިލަންދޫގެ ބިދޭސީ ޑިފެންޑަރު ހަބީލާ މާލީ ކައިރީގައި ވިއްދާފައި އޮތްވައެވެ.
މިރޭގެ މެޗަށް ނިލަންދޫން ނެރެފައި ވަނީ ބިދޭސީ އެންމެ ކުޅުންތެރިއެކެވެ. އަނެއް ދެ ކުޅުންތެރިންގެ ޓްރާންސްފާ ކަންތައް ނުނިމި އޮތުމުން މިރޭގެ މެޗުގައި އެ ދެކުޅުންތެރިން ކުޅެފައެއް ނުވެއެވެ.
މެޗުގެ 10 ވަނަ މިނެޓުގައި ދަގަނޑޭއަށް އިތުރު ފުރުސަތެއް ލިބުނު ނަމަވެސް އޭނާއަށް އެ ފުރުސަތުގެ ބޭނުން ހިފިފައެއް ނުވެއެވެ. އެހެން ނަމަވެސް މެޗުގެ 15 ވަނަ މިނެޓުގައި ޓީސީން ވަނީ އެޓީމުގެ ތިން ވަނަ ގޯލް ޖަހައިފައެވެ. އިބްރާހީމް މަހުދީ (ފޭދޫ އިއްބެ) އޭރިއާ ތެރެއަށް ނަގައިދިން ހުރަސް، ކޮންޓްރޯލް ކޮއްލުމަށްފަހު ގޯލްގެ ކަނަށް އަމާޒުކޮށްލީ މެޗުގެ މޮޅު ކުޅުންތެރިޔާގެ މަގާމު ހޯދި އިބްރާހީމް ވަހީދު (އިއްބެ) އެވެ.
ހާފް ނިމުމުގެ ކުރިން ޓީސީން ހަތަރު ވަނަ ގޯލެއްވެސް ޖެހިއެވެ. ޓީސީ އޭރިއާ ބޭރުން ލިބުނު ހިލޭ ޖެހުން ދަގަނޑޭ ފޮނުވާލި އިރު، އޭނާ އެ ބޯޅަ އަމާޒު ކޮށްލީ ގޯލްގެ ތިރީ ކަނަށެވެ. ނިލަންދޫގެ ކީޕަރު އަލީ ސޮބާހަށް ކުރެވޭނެ މާ ބޮޑު ކަމެއް ނެތެވެ.
ޓީސީން 4-0ގެ ލީޑެއްގައި ހާފް ނިންމާލި އިރު، ނިލަންދޫން ވަނީ ދެވަނަ ހާފްގައި ކުޅުން ރަނގަޅުކޮށްފައެވެ. ހާއްސަކޮށް ޑިފެންސް ތެރެއިން ޓީސީގެ ކުޅުންތެރިންނަށް ވަރަށް ބޮޑަށް ޖާގަ ކުޑަކޮށްގެން ކުޅުނުކަން ފާހަގަކޮށްލެވުނެވެ. އަދި ލިބުނު މަދު ފުރުސަތެއްގައި ކުރިއަށް ޖެހި ގޯލް ޖަހަންވެސް މަސައްކަތް ކޮށްފައިވެއެވެ.
ދެވަނަ ހާފްގެ ކުރީ ކޮޅުގައި ޓީސީގެ ފަސް ވަނަ ގޯލް އިއްބެ ކާމިޔާބުކޮށްދިން އިރު، 70 ވަނަ މިނެޓުގައި ދަގަނޑޭއަށް ވަނީ ހެޓްރިކް ހަދާނެ ފުރުސަތެއް ލިބިފައެވެ. ނިލަންދޫގެ ދެ ޑިފެންޑަރުން ކައިރިން ނައްޓާލުމަށްފަހު އޭނާ ފޮނުވާލި ބާރު ހަމަލާ ދިޔައީ ގޯލާ އަމާޒުނުވެއެވެ.
އޭގެ އިރުކޮޅެއް ފަހުން ފޭދޫ އިއްބެ، ޓީސީގެ ހަވަނަ ގޯލް ކާމިޔާބުކޮށްދިނީ އޭރިއާ ތެރޭގައި ހުސްކޮށް ހުރެ ފަސޭހަ ކަމާއެކު ބޯޅަ ގޯލަށް ވައްދާލައިގެންނެވެ. މެޗުގެ ދެވަނަ ހާފްގައި ނިލަންދޫގެ މަދު ފުރުސަތުތަކެއް ފެނިފައިވާ އިރު، އެންމެ ފާހަގަކޮށްލެވުނީ އިބްރާހީމް ފުރުގާން (ފުގޭ) ގެ ހަމަލާއެވެ. ޓީސީ އޭރިއާ ތެރެއިން އޭނާއަށް ލިބުނު ބޯޅަ ގޯލަށް އަމާޒުވި ނަމަވެސް ޓީސީގެ ނޭޕާލް ކީޕަރު ކިރަން ކުމާރު ވަނީ ފަސޭހަ ކަމާއެކު ބޯޅަ ހިފައިފައެވެ.
މެޗުގެ 90 ވަނަ މިނެޓުގައި ނިލަންދޫން ޖެހި ގޯލަކީ ޓީސީގެ މިޑްފީލްޑަރު މުހައްމަދު އައްޒާމްގެ ފައިގައި ޖެހި ބައިކޮޅަށް ވަން ގޯލެކެވެ. އެ ގޯލާއެކު ނިލަންދޫން ވަނީ ވަރަށް ބޮޑަށް އުފާފާޅުކޮށްފައެވެ. ހާއްސަކޮށް ސަޕޯޓަރުންގެ އަޑު ވަރަށް ބާރުވެގެން ދިޔަކަން ފާހަގަކޮށްލެވުނެވެ.
ފުރަތަމަ ހަފްތާގެ ކުރިއަށް ހުރި މެޗުތައް:
- 30 - ޖޫން 16:00 / ކްލަބު ގްރީން ސްޓްރީޓްސް - ށ. ފޯކައިދޫ
- 30 - ޖޫން 21:00 / ވިކްޓަރީ ސްޕޯޓްސް ކްލަބު - ބ. ފެހެންދޫ