ވޯލްޑް ކަޕް ކޮލިފައިން އޭޝިއާ ޒޯންގެ ގްރޫޕް 'ސީ'ގައި ބޫޓާނާ ރާއްޖެ ބައްދަލުކުރާ މެޗުގެ ލައިވް ކަވަރޭޖަށް ސަންގެ ކިޔުންތެރީންނަށް މަރުހަބާ!
ވޯލްޑް ކަޕް ކޮލިފައިން އޭޝިއާ ޒޯންގެ ގްރޫޕް 'ސީ'ގައި ބޫޓާނާ ރާއްޖެ ބައްދަލުކުރާ މެޗުގެ ލައިވް ކަވަރޭޖަށް ސަންގެ ކިޔުންތެރީންނަށް މަރުހަބާ!
ވޯލްޑް ކަޕް 2018 ކޮލިފައިންގެ ގްރޫޕް ސްޓޭޖްގައި ބޫޓާނާ ދެކޮޅަށް ރާއްޖެ ކުޅުނު މެޗު 3-4 ލަނޑުން ރާއްޖެ ކާމިޔާބުކޮށްފި އެވެ. މި މެޗުގައި ރާއްޖޭގެ ކެޕްޓަން އަލީ އަޝްފާގު (ދަގަނޑޭ) ވަނީ 3 ލަނޑުޖަހައިފައެވެ.
މި މެޗުގައި ބޫޓާނުން ޖެހި 3 ލަނޑުވެސް ކާމިޔާބުކޮށްފައި ވަނީ، މެޗު ނިމެން ވަރަށް ކައިރި ވެފައި ވަނިކޮށެވެ.
ބޫޓާންގެ ވެރިރަށް ތިންޕޫގެ ޗަންގްލިމިތަން ސްޓޭޑިއަމްގައި ކުޅުނު އޭޝިއާ ޒޯންގެ ގްރޫޕް "ސީ"ގެ މެޗުގެ 11 ވަނަ މިނިޓްގައި ރާއްޖެއަށް ބޫޓާންގެ ގޯލް ހުޅުވާލަދިނީ، އަޙްމަދު ނާޝީދު (ނާއްޓޭ) އެވެ. ނާއްޓޭ އެ ލަނޑު ކާމިޔާބުކުރީ، ބަކާ ވަރަށް ރީތިކޮށް ދިން ބޯޅަ ގޯލްތެރެއަށް ފޮނުވާލައިގެންނެވެ.
ގައުމީ ޓީމްގެ އާ ކޯޗު ރިކީ ހާބަޓްގެ އިރުޝާދުގެ ދަށުން ރާއްޖެ ކުޅުނު ފުރަތަމަ މެޗުގައި ރާއްޖޭގެ ދެވަނަ ލަނޑު މެޗުގެ 23 ވަނަ މިނިޓްގައި ކާމިޔާބުކޮށްދިނީ ކެޕްޓަން އަލީ އަޝްފާގު (ދަގަނޑޭ) އެވެ. ދަގަނޑޭ މި ލަނޑު ކާމިޔާބުކުރީ އަހްމަދު އިމާޒް (އާއްކޮ) ވަރަށް ރީތިކޮށް ބޫޓާން ގޯލް އޭރިޔާ ކުރިމަށްޗަށް ހުރަސްކޮށްލި ބޯޅަ ގޯލްތެރެއަށް ފޮނުވާލައިގެންނެވެ. ރާއްޖޭގެ ތިން ވަނަ ލަނޑު މެޗުގެ 33 ވަނަ މިނިޓްގައި ދަގަނޑޭ ކާމިޔާބުކުރީ، ނާއްޓޭ ވަރަށް ރީތިކޮށް ބޫޓާން ގޯލް ކުރިމައްޗަށް ހުރަސްކޮށްލި ބޯޅަ ގޯލްތެރެއަށް ބޮލުން ޖަހައި ގޯލް ތެރެއަށް ފޮނުވާލައިގެންނެވެ.
މެޗުގެ ދެވަނަ ހާފް 3 ލަނޑުގެ ލީޑަކާއެކު ފަށައިގެން ގޮސް ރާއްޖޭގެ ހަތަރު ވަނަ ލަނޑު 57 ވަނަ މިނިޓްގައި ދަގަނޑޭ ކާމިޔާބުކޮށްދިނީ ރާއްޖެއަށް ލިބުނު ޕެނަލްޓީއަކުންނެވެ. އެ ލަނޑަށް ފަހު ދަގަނޑޭގެ ބަދަލުގައި މުހައްމަދު އުމޭރު ވަނީ ކުޅެން ނެރެފައެވެ.
ބޫޓާންގެ ފުރަތަމަ ލަނޑު މެޗުގެ 85 ވަނަ މިނިޓްގައި އެޓީމަށް ކާމިޔާބުކޮށްދިނީ، ޝެރިން ޑޯޖީއެވެ. ބޫޓާން ކުޅުންތެރިއަކު ރާއްޖޭ ގޯލަށް ފޮނުވާލި ހަމަލާ ކީޕަރު މުހައްމަދު އިމްރާން އަތުގައި ޖެހިފައި ޕެނަލްޓީ އޭރިޔާތެރެއަށް ނުކުތްވަގުތު ޖޯޑީ ފޮނުވާލި ބާރު ހަމަލާ އަމާޒުވީ ރާއްޖޭގެ ގޯލަގެ މަތީ ކަނަށެވެ.
މެޗުގެ 88 ވަނަ މިނިޓްގައި ބޫޓާންގެ ދެވަނަ ލަނޑު ޖަހައި ދިނީ ޗެންޗޯ ގައެލްޝަން އެވެ. ރާއްޖޭގެ ޑިފެންޑަރުން ކައިރިން ވަރަށް ފަސޭހަކަމާއެކު ބޯޅަ ހިފައިގެން ޕެނަލްޓީ އޭރިޔާ ތެރެއަށް ދެމިގަނެ ޗެންޗޯ ފޮނުވާލި ބާރު ހަމަލާ އަމާޒުވީ ގޯލްގެ ތިރީ ކަނަށެވެ.
ބޫޓާންގެ ތިން ވަނަ ލަނޑު އެޓީމުން ކާމިޔާބުކުރީ މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ގޮތުގައި ދެއްކި ފުރަތަމަ މިނިޓްގައެވެ. އެޓީމަށް އެ ލަނޑު ޖަހައިދިނީ، ޒުވާން ފޯވާޑް ބިރެން ބާސްނެޓް އެވެ. އޭނާ އެ ލަނޑު ކާމިޔާބުކުރީ ޗެންޗޯ ރާއްޖޭގެ ގޯލަށް އަމާޒުކޮށް ފޮނުވާލި ބޯޅަ ގޯލްގެ އަރިމަތީ ދަނޑީގައި ޖެހިފައި ބޭރަށް ނުކުތްވަގުތު ގޯލްތެރެއަށް ބޯޅަ ފޮނުވާލައިގެންނެވެ.
މިމެޗުގައި ރާއްޖެ ކޮޅަށް ވަން ތިން ލަނޑުވެސް ވަދެފައި ވަނީ ޑިފެންސިން މިސްޓޭކްތަކެއްގެ ސަބަބުންނެވެ. މީގެ އިތުރުން މެޗުގައި ނަތީޖާފުޅާކުރަން ރާއްޖެއަށް ރަނގަޅު ދެތިން ފުރުސަތެއް ލިބި ވަނީ ބޭކާރު ވެފައެވެ.
މި ނަތީޖާއާއެކު ގްރޫޕް ސްޓޭޖްގައި ރާއްޖެ ކުޅުނު ހަތަރު މެޗުގެ ތެރެއިން ތިން މެޗުން ބަލިވެ އެއްމެޗުން ލިބުނު 3 ޕޮއިންޓާއެކު ރާއްޖެ އޮތީ ގްރޫޕް ސީގެ 4 ވަނައިގައެވެ. ހަތަރު މެޗުން ބަލިވެ ޕޮއިންޓެއް ނުލިބި ބޫޓާން ގްރޫޕުގެ ފުލުގައި އޮތް އިރު، ގްރޫޕްގެ އެއް ވަނައިގައި އޮތީ ކުޅުނު ތިން މެޗުން 9 ޕޮއިންޓް ހޯދައިގެން ގަތަރެވެ. އަދި ދެވަނަައިގައި އޮތީ، ތިން މެޗުން 7 ޕޮއިންޓާއެކު ޗައިނާއެވެ. ތިން ވަނައިގައި އޮތް ހޮންކޮންގަށް ވެސް ލިބިފައި ވަނީ 7 ޕޮއިންޓެވެ.
މި ގްރޫޕްގައި މިއަދު ދެން ކުޅޭ މެޗުގައި ވާދަކުރާނީ ގަތަރާއި ޗައިނާއެވެ.