ޕަބްލިކް ސާވިސް މީޑިއާ (ޕީއެސްއެމް)ގެ ދަށުން ކުޅިވަރު ޗެނަލެއް އުފައްދަން ޖެހޭ ގޮތަށް ލާޒިމްކޮށް ހުށަހެޅި ކުޅިވަރު ބިލް ރައްޔިތުންގެ މަޖިލީހުން މިއަދު ފާސްކޮސްފި އެވެ.
ސަރުކާރުގެ ފަރާތުން މަހިބަދޫ ދާއިރާގެ މެމްބަރު އަހުމަދު ޠާރިގު ހުށަހެޅުއްވި އެ ބިލު މަޖިލީހުން ފާސްކުރީ ވޯޓުގައި ބައިވެރިވެވަޑައިގެންނެވި މެމްބަރުންގެ އިއްތިފާގުން ނެވެ.
އެ ބިލު ދިރާސާކޮށް ކޮމެޓީން މަޖިލީހުގެ ތަޅުމަށް ހުށަހެޅުމުން އިތުރު ފަސް އިސްލާހެއް ވަނީ ހުށަހަޅައިފައެވެ. އެ އިސްލާހުތައް ހުށަހެޅުއްވީ މާފަންނު ދެކުނު ދާއިރާގެ މެމްބަރު އަބްދުﷲ ރިފާއު އެވެ. އޭނާ ހުށަހެޅުއްވި އިސްލާހުތައް ވަނީ މަޖިލީހުން ފާސްކުރައްވައިފައެވެ.
ބިލުގައި ބުނެފައި ވަނީ އެ ބިލް ފާސްވެ ގާނޫނަކަށް ބަދަލުވާ ހިސާބުން ފެށިގެން ހަ މަސް ދުވަހުގެ ތެރޭގައި ރާއްޖޭގެ އެކި ކުޅިވަރުތައް ޕްރޮމޯޓުކޮށް ކުރިއެރުވުމަށް ޓަކައި މޯލްޑިވްސް ސްޕޯޓްސް ޗެނަލްގެ ނަމުގައި ޓީވީ ޗެނަލެއް ގާއިމް ކުރަން ޖެހޭނެ ކަމަށެވެ. އަދި އެ ކުޅިވަރު ޗެނަލް ގާއިމްކުރަން ޖެހޭނީ މޯލްޑިވްސް ބްރޯޑްކާސްޓިން ކޯޕަރޭޝަންގެ ގާނޫނުގެ ދަށުން ގާއިމްކޮށްފައިވާ ޕަބްލިސް ސާވިސް މީޑިއާގެ ވަސީލަތްތައް ބޭނުންކޮށްގެން ކަމަށެވެ.
އެ ޗެނަލަކީ ޕަބްލިކް ސާވިސް މީޑިއާގެ އެއްބާރުލުމާ އެކު ކުޅިވަރާ ބެހޭ ގާނޫނުގެ ދަށުން އުފައްދާ މޯލްޑިވްސް ސްޕޯޓްސް ކޯޕަރޭޝަނުން ހިންގާ އަދި އެ ފަރާތަށް ހަމަހަމައަށް ހިންގައިގެން މަންފާ ހޯދޭނެ ޗެނަލެއް ކަމަށް ވެސް ބިލްގައިވެ އެވެ.
މި ޗެނަލް ގާއިމް ކުރެވޭ ތާރީހުން ފެށިގެން ތިން އަހަރު ދުވަސް ވަންދެން ޗެނަލް ހިންގައި ކުރިއެރުވުމަށް ޓަކައި ދާނެ ހަރަދު ދައުލަތުގެ ބަޖެޓުން މޯލްޑިވްސް ސްޕޯޓްސް ކޯޕަރޭޝަނުން ހަމަޖައްސައިދޭން ޖެހެ އެވެ. އަދި ތިން އަހަރު ފަހުން ޗެނަލް ހިންގުމަށް ޓަކައި ހަރަދުކުރާނީ ގާނޫނުގެ 25 ވަނަ މާއްދާގެ ދަށުން ކުންފުންޏަށް ލިބޭ އާމްދަނީން ނެވެ.
އެ ބިލު ފާސްވެ ގާނޫނަކަށް ވުމުން 90 ދުވަހުގެ ތެރޭގައި ރައީސުލްޖުމްހޫރިއްޔާ އައްޔަންކުރާ ކޮމިޝަނަރު އޮފް ސްޕޯޓްސްއެއް އައްޔަންކުރަން ޖެހެ އެވެ. އަދި ކޮމިޝަނަރު އޮފް ސްޕޯޓްސް އަށް މީހަކު އައްޔަން ކުރާއިރު އެމީހާގެ މަސްއޫލިއްޔަތުގެ ތެރޭގައި ރާއްޖޭގައި ވާދަވެރި ގޮތެއްގައި ކުޅެވޭ އެންމެހައި ކުޅިވަރެއްގައި ހަރަކާތްތެރިވާ ކުލަބު ޖަމިއްޔާ އަދި އެސޯސިއޭޝަންތައް ރަޖިސްޓްރީ ކުރުމާއި އެފަރާތްތަކުގެ އަސާސީ އަދި ހިންގާ ގަވާއިދުގެ މަތިން އެފަރާތްތައް އަމަލުކުރޭތޯ ފާރަވެރިވާން ޖެހެ އެވެ.
ކޮމިޝަނަރު އޮފް ސްޕޯޓްސްގެ ބާރުތަކުގެ ތެރޭގައި ދިވެހިރާއްޖޭގައި ވާދަވެރި ގޮތެއްގައި ކުޅެވޭ އެންމެހާ ކުޅިވަރެއްގައިމެ ހަރަކާތްތެރިވާ ފަރުދުންނާއި ކުލަބު ޖަމިއްޔާތަކާއި އެތަންތަނުގެ މެމްބަރުންގެ ދަފްތަރަށް ސައްހަނޫން މައުލޫމާތު ހުށަހަޅާ ފަރާތްތަކުގެ މައްޗަށް ކުޅިވަރާ ބެހޭ ގާނޫނުގެ ދަށުން ހަދާ ގަވާއިދުގައިވާ ގޮތުގެ މަތީން ފިޔަވަޅު އެޅޭނެ އެވެ.
އަދި އެ ގާނޫނުގެ ދަށުން އަލަށް އައްޔަން ކުރެވޭ ކޮމިޝަނަރު އޮފް ސްޕޯޓްސް އައްޔަންކުރުމަށް ފަހު އެއްވެސް ސަބަބަކާހުރެ އެ މަގާމު ހުސްވެފައިވާ ނަމަ ގިނަވެގެން 30 ދުވަހުގެ ތެރޭގައި އެ މަގާމަށް އެހެން ބޭފުޅަކު ރައީސުލްޖުމްހޫރިއްޔާ އައްޔަންކުރަން ޖެހެ އެވެ. އަދި ކޮމިޝަނަރު އޮފް ސްޕޯޓްސްގެ މަގާމުގައި ހުރި ބޭފުޅަކު މަގާމުން އިސްތިއުފާ ދެއްވައިފި ނަމަ ވެސް 30 ދުވަހުގެ ތެރޭގައި އެމަގާމަށް ބޭފުޅަކު ރައީސުލްޖުމްހޫރިއްޔާ އައްޔަންކުރަން ޖެހެ އެވެ.
ކޮމިޝަނަރު އޮފް ސްޕޯޓްސްއެއް މި ގާނޫނުގެ ދަށުން އައްޔަންކުރާ އިރު ކުޅިވަރާއި ބެހޭ ގައުމީ މަޖިލީހެއް އުފައްދަން ޖެހެ އެވެ.
ކޮމެޓީން ކުޅިވަރު ބިލު ފާސްކޮށްފައި މިވަނީ އެ ބިލަށް ކްލަބްތަކާއި ޖަމިއްޔާތަކުގެ ހިޔާލު ހޯދަން ސެމިނާއެއް ބޭއްވުމަށް ފަހު އެވެ. އެ ބައްދަލުވުމުގައި ޖަމިއްޔާތަކުން ވަނީ އެ ބިލާ ގުޅޭ ހިޔާލުތައް ހުށަހަޅައިފައެވެ.