ގިނަ އަދަދެއްގެ ޑޮލަރުތަކެއް އަޅާފައި ހުރި ސިޓީ އުރައެއް މަގުމަތިން ހޮވި ދެ މީހަކު ހޯދަން ފުލުހުން ވީޑީއޯއެއް އާންމުކޮށްފި އެވެ.
ފުލުހުން ބުނީ ސިޓީއުރައަކަށް ލާފައިވަނިކޮށް މަގުމައްޗަށް ވެއްޓި ގެއްލުނު ސިޓީއުރައިގެ ތެރޭގައި 7،500 ޑޮލަރު ހުންނާނެ ކަމަށެވެ.
ފުލުހުން އާންމުކޮށްފައިވާ ވީޑިއޯ އިން ފެންނަ ގޮތުގައި ދެ ޒުވާނަކު ސައިކަލުގައި އައިސް ޕާކު ކުރުމަށްފަހު، އެނބުރި ދާން އުޅެނިކޮށް އޭގެ ތެރެއިން އެކަކު ސައިކަލު ކައިރިން ސިޓީ އުރައެއް ނަގަ އެވެ. އަދި ސިޓީ އުރައިގެ ތެރޭގައި ހުރީ ކޮންއެއްޗެއްތޯ ބެލުމަށްފަހު ސައިކަލުގެ މަޑި ދަށަށްލާ ތަން ވީޑިއޯއިން ފެނެ އެވެ.
ފުލުހުން ބުނީ މިހާތަނަށް ކުރި މަސައްކަތުން އެއީ ކޮންބައެއްކަން އެނގިފައި ނުވާތީ އެކަމާ ގުޅޭގޮތުން ސުވާލު ކުރުމަށް ފުލުސް އޮފީހަށް އެ މީހުން ހާޒިރު ކުރެވިފައި ނުވާ ކަމަށެވެ. އަދި އެ ދެމީހުންނާއި ގުޅޭ މައުލޫމާތެއް އެނގޭ ފަރާތެއްވާނަމަ އެކަން ލަސްނުކޮށް ފުލުހުންނަށް އެންގުމަށް ފުލުސް އޮފީހުން އެދެ އެވެ.
