ކުރީގެ ރައީސް ނަޝީދު ދޫކޮށްލުމަށް ގޮވާލައި ސިޓީ ހުށަހަޅަން ދިޔަ ބަޔަކު މުޒާހަރާކޮށްފި

ކުރީގެ ރައީސް މުހައްމަދު ނަޝީދުގެ މައްޗަށް ކޮށްފައިވާ ދައުވާ އަނބުރާ ގެންގޮސް، ނަޝީދު ދޫކޮށްލުމަށް ގޮވާލައި، ރައީސް އޮފީހަށް ސިޓީއެއް ހުށަހަޅަން ދިޔަ ބަޔަކު މުޒާހަރާކޮށްފި އެވެ.

ކުރީގެ ރައީސް މުހައްމަދު މުހައްމަދު ނަޝީދު ދޫކޮށްލުމަށް ގޮވާލައި ލިޔެފައިވާ ސިޓީއެއް ހިފައިގެން މިއަދު މެންދުރު ރައީސް އޮފީސް ކައިރިއަށް އެއްވި އެމްޑީޕީގެ ސަޕޯޓަރުންތަކެއް ވަނީ އެ ސަރަހައްދުގައި މުޒާހަރާކޮށްފަ އެވެ. އޭގެ ތެރޭގައި ގިނައިން ހިމެނެނީ އެމްޑީޕީގެ އަންހެން މެމްބަރުންނެވެ.ނަމަވެސް އެ ސަރަހައްދަށް އެއްވި ބައެއް މީހުން އެ ސަރަހައްދުގެ މަގުމަތީގައި އިށީދެ މުޒާހަރާ ކުރަން ފެށުމުން ފުލުހުން ނުކުމެ ވަނީ އެ މީހުން އެ ސަރަހައްދުން ދުރަށް ޖައްސައިފަ އެވެ. ރައީސްގެ ސްޕޯކްސްޕާސަން އިބްރާހިމް މުއާޒު މިއަދު ސަން އަށް ވިދާޅުވީ އެމީހުންއައައީ ރައީސަށް ސިޓީއެއް ހުށަހަޅަން ކަމަށް ބުނެ ކަމަށާއި އޭގެ ތެރެއިން ބައެއް މީހުން ސިޓީ ހުށަހެޅި ކަމަށެވެ. ނަމަވެސް ފުލުހުން ނުކުމެ އެ ސަރަހައްދުން އެމީހުން ފޮނުވާލީ މަގުމަތީގައި އިށީދެތިބެ، އަޑުގަދަކޮށް މުޒާހަރާ ކުރަން ފެށުމުން ކަމަށެވެ.

ރައީސުލްޖުމްހީރިއްޔާ އަބްދުﷲ ޔާމީން އަށް އެޑްރެސްކޮށް އެމްޑީޕީގެ އަންހެނުންތަކެއް ލިޔެފައިވާ އެ ސިޓީގައި ބުނެފައިވާ ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު ހައްޔަރުކުރި މައްސަލާގައި ދައުލަތުގެ ފަރާތުން ނަޝީދުގެ މައްޗަށް އުފުލާފައިވާ ޓެރަރިޒަމްގެ ދައުވާ އަކީ އިންސާފުން ބޭރުން ނަޝީދުގެ މައްޗަށް އުފުލާފައިވާ ދައުވާއެއް ކަމަށެވެ. "ދައުލަތުގެ އެންމެ މަތީވެރިޔާގެ ހައިސިއްޔަތުން ނަޝީދުގެ މައްޗަށް އުފުލާފައިވާ ސިޔާސީ ދައުވާ އަނބުރާ ގެންދަވައި، ނަޝީދު ވަގުތުން ވަގުތަށް މިނިވަން ކޮށްދެއްވުމަށް އެދި ދެންނެވީ މެވެ." އެ ސިޓީގައިވެ އެވެ.