ކުރީގެ ރައީސް މުހައްމަދު ނަޝީދުގެ ވެރިކަން ބަދަލުވި ދުވަހާ ޖެހިގެން އައި ދުވަހު ގދ. ތިނަދޫގައި ހުޅުޖެހި މައްސަލައިގައި ތުހުމަތު ކުރެވޭ 89 މީހުންގެ މައްސަލަ އަލުން ކްރިމިނަލް ކޯޓަށް ހުށަހަޅައިފިއެވެ.
ޕްރޮސިކިއުޓާ ޖެނެރަލް އޮފީހުގެ ޕަބްލިކް ޕްރޮސިކިއުޓާ އާދަމް އާރިފް 'ސަން' އަށް ވިދާޅުވީ 89 މީހުންގެ މައްސަލަ ކްރިމިނަލް ކޯޓަށް ހުށަހަޅާފައި ވަނީ މިއަދު ކަމަށެވެ.
އަދި އެ މައްސަލަ ހުށަހަޅާފައި ވަނީ ދައުވާގެ ސީޢާއަށް އެއްވެސް ބަދަލެއް ނުގެނެސް ކުރިންވެސް އޮތްގޮތަށް ކަމަށް އޭނާ ވިދާޅުވިއެވެ.
މިދިޔަ ހޮނިހިރު ދުވަހު ކްރިމިނަލް ކޯޓުން އެ މައްސަލަ އަނބުރާ ފޮނުވާލާފައި ވަނީ، ހޮނިހިރު ދުވަހުގެ 10:00 ގައި ބާއްވަން ތާވަލްކުރި ޝަރީއަތުގެ މަޖިލީހަށް ދައުލަތުގެ ވަކީލު ހާޒިރުވެފައިނުވާތީ އެވެ.
އެ މައްސަލަ އަނބުރާ ފޮނުވާލުމަށްފަހު ކްރިމިނަލް ކޯޓުން އާންމުކުރި ބަޔާނެއްގައި ވަނީ ހެކީން ހާޒިރުކުރުމުގައި އެކަށީގެންވާ އެއްބާރުލުމެއް ދައުލަތުގެ ފަރާތުން ލިބެމުންނުދާ ކަމަށެވެ.
އެ 89 މީހުންގެ މައްޗަށް ދައުލަތުން އުފުލާފައި ވަނީ ޓެރަރިޒަމްގެ ދައުވާ އެވެ.
އެ ދައުވާ އުފުލާފައި ވަނީ ތިނަދޫ ޕޮލިސްޓޭޝަނާއި އެތަނުގައި ހުރި އެންމެހައި ވެހިކަލްތަކުގައި ހުޅުޖަހައި އަންދާލާފައިވާތީ އާއި ގދ. އަތޮޅު ކައުންސިލްގެ އިދާރާގެ އިމާރާތަށާއި މުދަލަށް ގެއްލުންދީ އެތަނުގެ ތެރެއަށް ވަދެ އެ އިދާރާގައި ހުޅުޖަހާފައިވާތީ އާއި ތިނަދޫ ކޯޓުގެ އިމާރާތަށާއި މުދަލަށް ގެއްލުންދީ ކޯޓުގައި ހުޅުޖަހާފައިވާތީ އެވެ.
އެހެންނަމަވެސް އެ ތުހުމަތުތަކަށް އެ އެންމެން ވެސް ވަނީ އިންކާރުކޮށްފައެވެ. އެ މައްސަލަ އަނބުރާ ފޮނުވާލާފައި ވަނީ ދައުލަތުން ހުށަހަޅާފައިވާ ބައެއް ހެކީންގެ ހެކިބަސް ވެސް ނަގާފައިވަނިކޮށެވެ.