ކޮލަމްބިޔާއަށް ނިސްބަތްވާ މިހާރު އުމުރުން 37 އަހަރުގެ ޝަކީރާ އޭނާގެ ދެ ވަނަ ދަރިފުޅަށް ބަނޑު ބޮޑުވިކަން އިއުލާނުކޮށްފައި ވަނީ އޭނާގެ ފޭސްބުކް ޕޭޖާއި ޓްވިޓާގައި މިދިޔަ ބުރާސްފަތި ދުވަހުގެ ރޭގަ އެވެ. ޝަކީރާ ބަނޑުބޮޑުކަން ހާމަކޮށް މެސެޖް ލިޔެފައިވާ އެކައުންޓް ތަކަކީ އޭނާގެ އަސްލު އެކައުންޓުކަން ކަށަވަރު ކަމަށް އޭޕީގައި ލިޔެފައިވެ އެވެ.
"އާނ، އަހަރެމެންގެ ދެ ވަނަ ދަރިފުޅުގެ އުންމީދުގައި މި ތިބީ!! އެންމެންގެ ހެޔޮ އެދުންތަކަށް ޝުކުރުވެރިވަން،" ގްރެމީ އެވޯޑް ހާސިލްކޮށްފައިވާ ހުނަރުވެރި ލަވަކިޔުންތެރިޔާ ލިޔެފައިވެ އެވެ.
ޝަކީރާ އޭނާގެ މާބަނޑުވުމާ ގުޅޭ ގޮތުން އިތުރު ތަފްސީލެއް ދީފައެއް ނުވެއެވެ.
Yes, we are expecting our second baby!! Thank you all for your well wishes!
— Shakira (@shakira) August 28, 2014ބާސެލޯނާ އާއި ސްޕެއިންގެ ގައުމީ ޓީމުގެ ޑިފެންޑަރު ޖެރާޑް ޕީކޭ، 27، އާއި ޝަކީރާގެ ފުރަތަމަ ދަރިފުޅު، މިލާން ޕީކޭ މެބަރަކް އުފަންވީ 22 ޖެނުއަރީ 2013ގަ އެވެ.
އެމްޓީވީ މިއުޒިކް އެވޯޑްސް ފަސް ފަހަރު، ގްރެމީ އެވޯޑްސް ދެ ފަހަރު، ލެޓިން ގްރެމީ އެވޯޑްސް އަށް ފަހަރު، ބިލް ބޯޑް މިއުޒިކް އެވޯޑް ހަތް ފަހަރު އަދި މި ނޫން ވެސް ގިނަ މިއުޒިކު އެވޯޑްތަކެއް ހާސިލްކޮށްފައިވާ ޝަކީރާއަކީ ލަވަ ކިޔުމުގެ އިތުން އިޖުތިމާއީ ހިދުމަތުގައި ވެސް ހަރަކާތެރިވާ ފަންނާނެކެވެ.
ފޯބްސްއިން ހޮވާ ދުނިޔޭގެ އެންމެ ނުފޫޒު ގަދަ އަންހެނުންގެ، 2014 ވަނަ އަހަރުގެ ލިސްޓުގައި ޝަކީރާ ހިމެނެނީ 58 ވަނައިގަ އެވެ.