މިދިޔަ މާޗް މަހުގެ 22 ވަނަ ދުވަހު ބޭއްވި ރައްޔިތުންގެ މަޖިލީހުގެ އިންތިޚާބާ ގުޅިގެން ބާތިލް ކުރުމަށް ހުށަހެޅި ނުވަ ދާއިރާގެ އިންތިޚާބު ބާތިލް ކުރެވެން ނެތް ކަމަށް ހައިކޯޓުން ހުކުމް ކޮށްފި އެވެ.
އިންތިޚާބީ ޝަކުވާގެ ގޮތުގައި ޖުމްލަ 13 މައްސަލައެއް ހައިކޯޓަށް ހުށަހަޅާފައި ވެ އެވެ. އޭގެތެރޭގައި ހިމެނެނީ އިންތިޚާބު ބާތިލް ކުރަން ހުށަހެޅި ނުވަ ދާއިރާގެ މައްސަލަ އާއި ތިން ރަށެއްގައި ބެހެއްޓި ވޯޓު ފޮށީގެ ނަތީޖާ ބާތިލް ކުރަން ހުށަހެޅި މައްސަލަ އެވެ. އަދި ވޯޓު ފޮއްޓެއްގެ ނަތީޖާ އަލުން ގުނައިދިނުމަށް އިލެކްޝަންސް ކޮމިޝަންގެ މައްޗަށް އަމުރެއް ނެރެދިނުމަށް ވެސް މައްސަލައެއް ހުށަހަޅާފައި ވެ އެވެ.
އިންތިޚާބު ބާތިލް ކުރަން ހުށަހެޅި ދާއިރާ ތަކަކީ ހިތަދޫ މެދު ދާއިރާ އާއި ހިތަދޫ އުތުރު ދާއިރާ އާއި ކާށިދޫ ދާއިރާ އާއި ފޭދޫ ދާއިރާ އާއި ފުނަދޫ ދާއިރާ އާއި ފެލިދޫ ދާއިރާ އާއި އިސްދޫ ދާއިރާ އާއި ވިލިނގިލީ ދާއިރާގެ އިތުރުން ނައިފަރު ދާއިރާ އެވެ.
ގެމަނަފުށީ ދާއިރާގެ ދެއްވަދޫގައި ބެހެއްޓި ވޯޓު ފޮށީގެ ނަތީޖާ ބާތިލް ކުރަން ހުށަހެޅީ އެމްޑީޕީން ނެވެ. ތިމަރަފުށީ ދާއިރާގެ ވޭމަންޑޫގައި ބެހެއްޓި ފޮށީގެ ނަތީޖާ ބާތިލް ކުރަން ޕީޕީއެމްގެ ކެންޑިޑޭޓް އަހްމަދު ޝަރީފް ހުށަހެޅުއްވި އިރު ނޮޅިވަރަމް ދާއިރާގެ ރައްޔިތުން ވޯޓުލުމަށް މާލޭގައި ބެހެއްޓި ފޮށީގެ ނަތީޖާ ބާތިލް ކުރަން ހުށަހެޅުއްވީ އެމްޑީޕީގެ ކެންޑިޑޭޓް އަލީ އާރިފް އެވެ.
އެމްޑީޕީ އާއި އެ ޕާޓީގެ ކެންޑިޑޭޓުން ހުށަހެޅުއްވި މައްސަލަތަކުގައި ޖުމްލަކޮށް ބުނެފައި ވަނީ ޕީޕީއެމްގެ ކެންޑިޑޭޓުން ސަރުކަރުގެ މުވައްޒަފުންނަށް މަޖުބޫރުކޮށްގެންނާއި މީހުންނަށް ރިޝްވަތުދީގެން ވޯޓު ހޯދާފައިވާ ކަމަށެވެ. ނަމަވެސް ހައިކޯޓުގެ ހުކުމްތަކުގައި ބުނެފައި ވަނީ އެފަދަ އެއްވެސް އަމަލެއް ޕީޕީއެމްގެ ކެންޑިޑޭޓުން ކުރި ކަން ސާބިތުކުރެވޭ ވަރުގެ ހެކި ޝަރީއަތަށް ހުށަހަޅާފައި ނުވާ ކަމަށެވެ.
ޕީޕީއެމްގެ ކެންޑިޑޭޓުން ހުށަހެޅުއްވި މައްސަލަތަކުގައި ބުނެފައި ވަނީ އެމްޑީޕީގެ ކެންޑިޑޭޓުން މީހުންނަށް ރިޝްވަތުދީގެން ވޯޓު ހޯދާފައިވާ ކަމަށެވެ. ނަމަވެސް އެފަދަ ކަމެއް އެމްޑީޕީގެ ކެންޑިޑޭޓުން ކުރިކަން ސާބިތު ކުރެވޭ ވަރުގެ ހެއްކެއް ޝަރީއަތަށް ހުށަހެޅިފައިނުވާ ކަމަށް ހައިކޯޓުގެ ހުކުމްގައި ވަނީ ބުނެފަ އެވެ.
ނޮޅިވަރަމް ދާއިރާ އަށް ވާދަކުރެއްވި އެމްޑީޕީގެ ކެންޑިޑޭޓް އަލީ އާރިފް ހުށަހެޅުއްވި މައްސަލައިގައި ބުނެފައި ވަނީ މާލޭގައި ބެހެއްޓި ވޯޓު ފޮށީގެ ވޯޓުލުން ފަށާފައި ވަނީ ކުރިން ކަނޑައަޅާފައި އޮތް ވަގުތަށްވުރެ ފަހުން ކަމަށާއި އޭގެބަދަލުގައި ވަގުތު އިތުރު ކުރާނެ ކަމަށް އިލެކްޝަންސް ކޮމިޝަނުން ބުނި ނަމަވެސް އެގޮތަށް އަމަލުކޮށްފައިނުވާ ކަމަށެވެ. އަދި އޭގެސަބަބުން ވޯޓުލާން ދިޔަ ބައެއް މީހުންނަށް ވޯޓުލުމުގެ ހައްގު ގެއްލިފައިވާ ކަމަށް ވެސް އެ މައްސަލައިގައި ވަނީ ބުނެފަ އެވެ.
އެ މައްސަލައިގެ ހުކުމްގައި ބުނެފައި ވަނީ ވޯޓުލުން ނިންމާ ގަޑި އިތުރު ނުކުރެވޭނެ ކަމަށް އިންތިޚާބު ކުރިއަށްދިޔަ އިރު އިލެކްޝަންސް ކޮމިޝަނުން އިއުލާން ކޮށްފައިވާ ކަމަށެވެ. އަދި ވޯޓުލުން ބަންދު ކުރި އިރު ކިޔުގައި ހުރީ އެންމެ މީހެއް ކަމަށާއި އެއަދަދަކީ އިންތިޚާބުގެ ނަތީޖާ އަށް ބަދަލު އަންނާނެ އަދަދެއް ނޫން ކަމަށް ވެސް އެ ހުކުމްގައި ވަނީ ކަނޑައަޅައިފަ އެވެ.
ރިޝްވަތުދިން ކަމަށް ތުހުމަތުކޮށްފައިވާއިރު، އެފަދަ މައްސަލަތައް އިލެކްޝަންސް ކޮމިޝަންގެ ކޮމްޕްލަޔަންސް ބިއުރޯ އަށާއި ތަހުގީގީ އިދާރާތަކަށް ހުށަހަޅާފައި ނުވާ ކަމަށް ހުކުމްތަކުގައި ވަނީ ފާހަގަކޮށްފަ އެވެ. އަދި އެފަދަ ކަންކަމަކީ ނަތީޖާއަށް ބަދަލުއަންނާނެ ވަރުގެ ކަމެއް ކަމަށް ގަބޫލުކުރެވޭނަމަ އޭރުވެސް އެފަދަ މައްސަލަތައް ޝަކުވާގެ ގޮތުގައި ހުށަހަޅާނެ ކަމަށް ފަނޑިޔާރުންނަށް ގަބޫލު ކުރެވޭ ކަމަށް ވެސް އެ ހުކުމްތަކުގައި ވަނީ ބުނެފަ އެވެ.
އަށާރަ ވަނަ ރައްޔިތުންގެ މަޖިލީހަށް އިންތިޚާބުވި 85 މެމްބަރުން ހުވާކުރުމަށް ހަމަޖެހިފައި ވަނީ އަންނަ މަހުގެ 28 ވަނަ ދުވަހު އެވެ. ޕީޕީއެމުން ވަނީ އިންތިހާބުގައި 33 ގޮނޑި ކާމިޔާބުކޮށްފަ އެވެ. އިދިކޮޅު އމެްޑީޕީން ވަނީ 26 ގޮނޑި ކާމިޔާބުކޮށްފަ އެވެ. އަދި އެމްޑީއޭ ފަސް ގޮނޑި ކާމިޔާބުކޮށްފައިވާއިރު، ޖޭޕީން ވަނީ 15 ގޮނޑި ކާމިޔާބުކޮށްފަ އެވެ. އަމިއްލަ ގޮތުން ކުރިމަތިލެއްވި ފަސް މެމްބަރަކު މަޖިލީހަށް އިންތިހާބުވެފައިވާއިރު، އަދާލަތައް ލިބިފައިވަނީ އެންމެ ގޮނޑިއެކެވެ.
