ޓްރާންސްޕޯޓް މިނިސްޓްރީން އެކުލަވާލާފައިވާ ޓެކްސީ ދުއްވުމާ ބެހޭ އައު ގަވައިދުގެ ދަށުން ޓެކްސީތަކުގައި ހަރުކުރަންޖެހޭ "ދިއްލޭ ބޯޑު" ހަރުކޮށްގެން ޓެކްސީއަކުން މާލޭގައި ދަތުރު ކުރަން ފަށައިފި އެވެ.
ފުރަތަމަ ފަހަރަށް ދިއްލޭ ބޯޑު ޖަހައިގެން ދަތުރުކުރަން ފަށާފައި ވަނީ ސިޓީ ކެބް (3321313) ސެންޓަރުގެ ޓެކްސީއަކުންނެވެ. ދިއްލޭ ބޯޑު ހަރުކުރި އެ ޓެކްސީގައި ފުރަތަމަ ފަހަރަށް ދަތުރު ކުރައްވާފައި ވަނީ ޓްރާސްޕޯޓް މިނިސްޓަރު އަމީން އިބްރާހިމެވެ. މިނިސްޓަރު އަމީން ޓެކްސީގައި ވަޑައިގެންނެވީ ވީޓީވީއިން ޖުމްހޫރީ ޕާޓީގެ މައި ޖަގަހަ ހިންގާ މ. ކުނޫޒަށެވެ.
ދިއްލޭ ބޯޑު ހަރުކުރި ޓެކްސީ ދުއްވަން މިރޭ އިން ޑުރައިވަރު، ލ. މައިބައިދޫ އަހްމަދު އާދަމް "ސަން"އަށް ބުނީ އެ ޓެކްސީ ބޯޑު ހަރުކުރީ މިރޭ 9:00 ހާއިރު ކަމަށެވެ. އަދި އެ ބޯޑު ހަދައިދިނީ މާލޭގެ ގަރާޖަކުން ކަމަށާއި ދިއްލޭ ބޯޑުއިނީ "ހަރު ދަނގަޑު އަރާފައި" ކަމަށް ވެސް އޭނާ ބުންޏެވެ.
އާދަމް ބުނީ އެ ބޯޑު ޖެހުމުން ވަރަށް ގިނަ މީހުުންގެ ސަމާލުކަން އެ ކަމަށް ހުއްޓޭ ކަމަށެވެ. އަދި ދިއްލޭ ބޯޑު ޓެކްސީތަކުގައި ހަރުކުރުމުގެ ސަބަބުން ޓެކްސީ ހޯދާ މީހުންނަށް އެ ޓެކްސީ އުޅެނީ ދަތުރެއްގަތޯ ނޫނީ ނޫންތޯ އެނގި އެ މީހުންނަށް ވެސް ފަސޭހަތަކެއް ވެގެންދާނެ ކަމަށް އޭނާ ބުންޏެވެ.
"ދިއްލޭ ބޯޑު ހަރުކުރުމުން އަތް ނެގުން ހުއްޓޭނެ. ނަމަވެސް ދުވަސް ކޮޅެއް ނަގާނެ. މިކަމަށް ތޮރުފާކަށް ވެސް ނުޖެހޭ. މިހާރުވެސް ސިލިކޯނުން ހަރުކޮށްފަ މިހުރީ. ހަމަ ހަރު ދަނގަޑު،" ޒުވާން ޓެކްްސީ ޑްރައިވަރު ބުންޏެވެ.
ދިއްލޭ ބޯޑު ކޮންޓްރޯލް ކުރަނީ ޑްރައިވަރެވެ. އެގޮތުން ހުދު ކުލައިގެ ބޯޑެއްގައި "TAXI" ޖަހާފައި ހުންނަ އެ ބޯޑު ދަތުރެއްގައި އުޅޭއިރު ދިއްލިފައި ހުންނަނީ ރަތް ކުލައިންނެވެ. އަދި ދަތުރެއްގައި ނޫޅޭނަމަ އެ ބޯޑު ދިއްލިފައި ހުންނަނީ ފެހިކުލައިންނެވެ. އެއްވެސް ދަތުރެއް ބޭނުން ނުވާނަމަ ބޯޑު ނިންވާލާފަ ވެސް ބެހެއްޓެ އެވެ.
ދިއްލޭ ބޯޑު ޓެކްސީ ތަކުގައި ހަރު ކުރުމުގެ ސުންގަނޑި ހަމަވާނީ އަންނަ މަހުގެ 15 އަށެވެ.