އުރީދޫ މޯލްޑިވްސްގެ މައި އޮފީހުގައި ބޭއްވި އުރީދޫ ނޭޝަންގެ އީއޭއެފްސީ މޯލްޑިވްސް ޗެމްޕިއަންޝިޕް ކޮންޓެންޑާ ސީރީޒްގެ ނަތީޖާ ފާޅުކޮށްފިއެވެ.
މި މުބާރާތް ކުރިއަށް ގެންގޮސްފައިވަނީ މިދިޔަ ބުރާސްފަތި ދުވަހުން ފެށިގެން ހޮނިހިރު ދުވަހުގެ ނިޔަލަށެވެ. އެ މުބާރާތް ކުރިއަށްގެންދިޔައީ، މޯލްޑިވްސް އީ-ސްޕޯޓްސް އެސޯސިއޭޝަނާ ގުޅިގެންނެވެ.
އުރީދޫ ނޭޝަންގެ އީއޭއެފްސީ ޗެމްޕިއަންޝިޕްގެ ނަތީޖާ ފާޅުކޮށްފި--- ފޮޓޯ:އުރީދޫ
އީއޭއެފްސީ މޯލްޑިވްސް ޗެމްޕިއަންޝިޕް ކޮންޓެންޑަ ސީރީޒް، ސީޒަން އެކެއްގެ އެންމެ މޮޅު ކުޅުންތެރިންނަށް ހޮވުނީ:
- ޗެމްޕިއަން: މުހައްމަދު ޒަމީލް ޒިހުނީ (8000 ރުފިޔާ)
- ރަނަރަޕް: ރާއިދު ހަސަން (4500 ރުފިޔާ)
- 2 ވަނަ ރަނަރަޕް: މުހައްމަދު ރިޝްފާން އަހްމަދު (2500 ރުފިޔާ)
އުރީދޫއިން ބުނީ އުރީދޫ ނޭޝަންގެ ފަރާތުން ރާވައިގެން ކުރިއަށްގެންދާ އެ މުބާރާތްތަކަކީ ރާއްޖޭގައި ކުރިއަރަމުންދާ އީ-ސްޕޯޓްސް ކޮމިއުނިޓީއަށް ހިތްވަރުދީ، އެންމެން އެއްތަނަކަށް ގެނެސް، ވާދަކުރެވޭނެ މާހައުލެއް ގާއިމުކޮށްދިނުމަށް ބާއްވާ މުބާރާތްތަކެއް ކަމަށެވެ.
މީގެއިތުރުން، އުރީދޫއިން މަސައްކަތްކުރަނީ ރާއްޖޭގައި އީ-ސްޕޯޓްސް ކުރިއަރުވައި މިކަމުގައި އުޅޭ ޒުވާނުންނަށް އިތުރު ފުރުސަތު ހޯދައިދިނުމަށް ކަމަށް އެ ކުންފުނިން ބުންޏެވެ.
އެއާއެކު، އުރީދޫ ނޭޝަން ގޭމާސް ލޭންޑްގެ ކުރިއަށް ހުރި މުބާރާތްތައް ވަރަށް އަވަހަށް އިއުލާނު ކުރާނެ ކަމަށް އުރީދޫއިން ބުންޏެވެ.