ކުރީގެ ރައީސް މައުމޫން އަބްދުލްގައްޔޫމާއި އެމަނިކުފާނުގެ އާއިލާގެ ދެ މެމްބަރަކު މާފުށީ ޖަލުގައި ހުންނެވި އިރު އެރަށުގެ ރައްޔިތުން އެ އާއިލާއާ ބެހެއްޓި ގާތްކަމަށް ޝުކުރު އަދާކުރުމަށް އެމަނިކުފާނާއި އާއިލާ އެރަށަށް ވަޑައިގެންފިއެވެ.
ފެބްރުއަރީ އެއްވަނަ ދުވަހު ސުޕްރީމް ކޯޓުން ނެރުނު އަމުރާ ގުޅިގެން ކުއްލި ހާލަތު އިއުލާނުކުރުމަށްފަހު ރައީސް މައުމޫން އަބްދުލްގައްޔޫމުގެ އިތުރުން ދަނބިދަރިކަލުން މުހައްމަދު ނަދީމް ހައްޔަރުކުރިއެވެ. އަދި އެމަނިކުފާނުގެ ދަރިކަލުން އަހްމަދު ފާރިސް މައުމޫނުވެސް އެކި ތުހުމަތުތަކުގައި ހައްޔަރުކޮށް، މާފުށީ ޖަލުގައި ބަންދުކުރިއެވެ.
ރައީސް މައުމޫނު މިއަދު ކުރެއްވި ޓްވީޓެއްގައި ވިދާޅުވީ، އެމަނިކުފާނާއި އަނބިކަނބަލުން ނަސްރީނާ އިބްރާހިމާއި ދަރިކަނބަލުން ދުންޔާއާއި ޔުމްނާ މައުމޫނުގެ އިތުރުން ދަނބިދަރިކަލުން މިއަދު މާފުއްޓަށް ހާއްސަ ދަތުރެއް ކުރެއްވި ކަމަށެވެ.
My wife and I, together with Dunya, Yumna and Nadheem made a special visit to Maafushi today in appreciation of the kindness shown by the people to my wife and family members during their numerous trips there to visit me, Faris and Nadheem at Maafushi prison. pic.twitter.com/tl17Mafueo
— Maumoon Abdul Gayoom (@maumoonagayoom) October 20, 2018
ރައީސް މައުމޫނު ވިދާޅުވީ އެ ދަތުރަކީ އެމަނިކުފާނާއި ފާރިސް އަދި ނަދީމް މާފުށި ޖަލުގައި ބަންދުކޮށްފައި ބެހެއްޓި އިރު، އެބޭފުޅުންގެ އަރިހަށް ޒިޔާރަތްކުރެއްވި އާއިލާ މެމްބަރުންނާމެދު މާފުށީ ރައްޔިތުން ބެހެއްޓި ގާތްކަމާއި އޯގާތެރިކަމަށް ޝުކުރުއަދާކުރެއްވުމަށް ކުރެއްވި ދަތުރުފުޅެކެވެ.
ރައީސް މައުމޫން އަބްދުލްގައްޔޫމާއި ދަރިކަލުން އަހްމަދު ފާރިސް މައުމޫނު މިނިވަންވީ ކަފާލާތުގެ ދަށުން، ސެޕްޓެމްބަރު 30 ވަނަ ދުވަހުއެވެ. އޭރު ރައީސް މައުމޫން ގެންދެވީ އަދުލު އިންސާފު ގާއިމުކުރުމަށް ހުރަސްއެޅި ކަމަށް ބުނެ، އެއް އަހަރާއި ހަތް މަހުގެ ޖަލު ހުކުމެއް ތަންފީޒުކުރައްވަމުންނެވެ.
އެހެން ނަމަވެސް އެ ހުކުމް، ހައި ކޯޓުން ވަނީ މިދިޔަ ބުރާސްފަތި ދުވަހު ބާތިލުކޮށްފައެވެ.